पर्याप्त प्रचारप्रसार गर्न सकेमा बझाङको हिमाली भेगमा रहेको सुर्मा सरोवर पर्यटन विकासको नया सम्भावना हुने विज्ञहरूले औल्याएका छन् । बझाङबाट चार दिनको पैदल यात्रापछि पुगिने सुर्मा सोवरमा ऐतिहासिक, धार्मिक, पर्यटकीय र आर्थिक विकासको अनगिन्ति सम्भावना देखिएका छन् ।
जति भोक, रोग र सोक जस्ता अभावै अभावले ग्रसित छ त्यति नै प्राकृतिक सुन्दरताले पनि भरिपूर्ण रहेको छ सुदूर पश्चिम । सुन्दरता नै सुन्दरताको भूमिभन्दा पनि फरक नपर्ने यो क्षेत्रका विभिन्न जिल्लामा अवस्थित मनोरम प्राकृतिक दृश्यहरू साँच्चिकै हेर्न लायक रहेका छन् ।
यस्तै मध्येको एक सुर्मा सरोवर । सुदूरपश्चिमको विकट पहाडी जिल्ला बझाङको हिमाली भेगमा अवस्थित चैनपुरबाट चार दिनको पैदल यात्रामा पुगिने यो क्षेत्र ऐतिहासिक, धार्मिक, पर्यटकीय तथा आर्थिक रुपमा पनि त्यति नै महत्व बोकेको छ ।
बाह्रै मास हिउले ढाकिरहने यस क्षेत्रमा वर्षको एक पटक भव्य मेला लाग्ने गर्दछ । बिरी जात्राको नामले प्रसिद्ध यस मेलामा देश विदेशका दसौं हजार तीर्थयात्री पूजाआजाको लागि आउने गर्दछन् । चोखो निम्तो रही शुद्ध मनले यो ठाउँमा गयो भने चिताएको वर पाइने जनविश्वास रहेको यो क्षेत्र उचित प्रचारप्रसारको अभावमा ओझेलमा परेको छ ।
|