दसैँमा कारोबार हुन नसकेको सुनको व्यवसाय अहिले तिहारमा बढेको छ। नेपाल सुनचाँदी व्यवसायी महासङ्घका अनुसार काठमाडौँमा मात्र यो हप्ता दैनिक 25 किलो सुन तथा 200 किलो चाँदीको कारोबार भएको छ। दसैँमा दैनिक 10 किलो सुन तथा करिब 100 किलो चाँदी खरिद बिक्री भएको राष्ट्रिय समाचार समितिले लेखेको छ।
महासङ्घका अध्यक्ष मणिरत्न शाक्यले अन्तर्राष्ट्रिय बजारमा बढ्दै गएको सुनको मूल्य र नेपाली रुपियाँको क्रय शक्ति घट्दै गएका कारण सुनको कारोबारमा कमी आएकाले व्यवसायीलाई काम गर्न कठिन भएको बताउनुभयो।
लक्ष्मीपूजामा धेरै थोरै सुन किनेर घरमा सङ्ग्रह गर्नुपर्छ भन्ने मान्यताका कारण पनि अहिले सुनको व्यापार बढेको हो। सामान्य दिनमा अहिले दैनिक पाँच/छ किलो पनि सुन तथा गरगहना बिक्री हुन नसकेको अवस्थामा तीन दिनमा करिब 60 किलो सुनको बिक्रीले व्यवसायीलाई आशा पलाएको छ।
मखनमा काँचो सुन व्यापार गर्दै आउनुभएका नेभी श्रेष्ठले "मानिसहरुले सुन भनेको नगद नै हो " भनी सकेको सञ्चय गर्ने र अप्ठेरो परेका समयमा बिक्री गरी व्यावहारिक काम चलाउँदै आएको भए पनि अहिले सुनको मूल्य उच्च रहेकाले लुटपाट तथा असुरक्षाको महसुस गरी आवश्यक परेका समय केही किन्ने गरेको अनुभव सुनाउनुभयो।
नेपाल राष्ट्र बैंकले विगतमा सुनको आयात अत्यधिक भएकाले व्यापार घाटा बढ्दै गएको भन्दै त्यसलाई न्यूनीकरण गर्न दैनिक 20 किलो मात्र सुन आयात गर्न अनुमति दिएको थियो। सो सीमाअनुसार बजारको माग धान्न नसकिने भन्दै आएका व्यवसायीले पछिल्लो समय सुन बिक्री नभएपछि सुन उठाउन छाडेका थिए।
