चिसोका कारण नेपालको पूर्वी क्षेत्रमा नौजनाको मृत्यु

    शीतलहरका कारण चिसो बढेपछि नेपालको पूर्वी तराईमा दुई सातामा नौजनाको मृत्यु भएको छ। आर्थिक अवस्था कमजोर भएर लगाउने पर्याप्त कपडा नहुँदा चिसोले मृत्यु हुनेको संख्या बढेको पूर्व क्षेत्रीय प्रहरी प्रमुख डीआईजी नवराज सिलवालले बताउनु भएको अन्नपूर्णपोष्ट अनलाइनले लेखेको छ।

    विगत वर्षमा भन्दा पहिले नै तराईमा शीतलहर सुरु भएपछि पीडित हुनेको संख्या बढेको सिलवालको भनाइ छ। 'शीतलहरले जनजीवन कष्टकर बन्नुका साथै मानवीय क्षति हुन थालेको हो', सिलवालले भन्नुभयो। सिलवालका अनुसार मोरङमा तीन, सिराहा र सप्तरीमा एकएकजनाको मृत्यु भएको छ। मृत्यु हुनेमा आर्थिक अवस्था कमजोर भएका र पर्याप्त लत्ताकपडा नभएकाहरू छन्।

    पूर्व क्षेत्रीय प्रहरी कार्यालयका अनुसार चिसोका कारण पुस 8 गते विराटनगर 10 की 50 वर्षीय आशा ऋषिदेव र पुस 3 गते मोरङकै हसनदह 3 का 83 वर्षीय नोहा सतारको कठ्यांग्रिएर मृत्यु भएको थियो। त्यस्तै मोरङको बबियाविर्ता 3 मा चिसोले कठ्यांग्रिएर 12 दिनअघि एक भारतीय नागरिकको मृत्यु भएको थियो। अत्यधिक मदिरा पिएका कारण हिँड्न नसकेको र रातको समयमा सडककिनारमै सुत्दा चिसोले कठ्यांग्रिएर भारतको अररियाका 60 वर्षीय नारायण तत्माको मृत्यु भएको हो।

    शीतलहरका कारण पुस 9 गते सप्तरीको बनौनिया 2 का 70 वर्षीय चन्द्रेश्वर खाङ र पुस 13 गते आइतबार सिराहाको इटहरवा 2 का 50 वर्षीय लखन पासवानको मृत्यु भएको छ। पूर्वाञ्चलमा चिसोका कारण प्रभावित हुनेको संख्या बढ्दै गए पनि प्रभावकारी रूपमा राहत वितरण हुनसकेको छैन।

    चिसोबाट जोगिन जनचेतनामूलक कार्यक्रम गर्ने, चिसोका बारेमा प्रचारप्रसार गर्ने, प्रभावित हुनेहरूका लागि अग्रीम रूपमा राहत संकलन गर्ने, आगो ताप्न दाउराको व्यवस्थापन गर्ने भनिए पनि पर्याप्त तयारी अभावमा प्रभावकारी हुन सकिरहेको छैन।

    यसैबीच चिसोबाट पीडित भएकाका लागि मोरङ, सिराहा र सप्तरीमा केही राहत सामग्री वितरण भएका छन्। नेपाल प्रहरी श्रीमती संघ र न्यानो संसारले कम्बल, धुस्सालगायत विभिन्न लत्ताकपडा, चाउचाउ र बिस्कुट वितरण गरेका हुन्।

    मोरङमा 75 र सप्तरीमा 6 सय 90 परिवारलाई राहत सामग्री वितरण गरिएको डीआईजी सिलवालले बताउनुभयो। सिराहामा पनि दुई सय 40 थान कम्बल वितरण गरिएको छ। पीडितहरूलाई नि:शुल्क स्वास्थ्य परीक्षण र औषधिसमेत वितरण गरिएको जानकारी सिलवालले दिनुभयो।

    त्यसैगरी केही दिनयता बढेको अत्यधिक चिसोका कारण सिराहामा गए राति एकजनाको मृत्यु भएको छ। पछिल्लोपटक मृत्यु हुनेमा सिराहाको इटहर्वा 2 निवासी 60 वर्षीय लखन पासवान रहेको इलाका प्रहरी कार्यालय महेशबारीले जनाएको छ। तीन सातामा सिराहामा चिसोका कारण मृत्यु हुनेको संख्या चार पुगेको छ।

    यसअघि गत बिहीबार साँझ सिराहाको चन्द्रअयोध्यापुर 7 निवासी लालदेव सदाकी 20 दिनकी छोरी अञ्जुकुमारी सदाको चिसोले कठ्यांग्रिएर मृत्यु भएको थियो। यस्तै चिसोका कारण दुई साताअघि सिराहाको सुखीपुर 8 निवासी 60 वर्षीय बौवा सदा र विद्यानगर 2 निवासी 50 वर्षीया आशादेवी मण्डलको मृत्यु भएको थियो। मंसिरको अन्तिम साताबाट सुरु भएको चिसो बढेपछि जिल्लाको जनजीवन प्रभावित भएको छ। बाक्लो हुस्सु र चिसो हावाका कारण बस्तीहरूमा रुघाखोकी, ज्वरो, श्वासप्रश्वास र हाडजोर्नीका बिरामी बढेका छन्।

    सिराहा सदरमुकामस्थित जिल्ला अस्पताल, लाहान अस्पताल र ग्रामीण भेगका सरकारी स्वास्थ्य संस्थामा अहिले बिरामीको चाप निकै बढेको जिल्ला जनस्वास्थ्य कार्यालय सिराहाले जनाएको छ।