फन्ट डाउनलोड
सि.आर.आइको संक्षिप्त परिचयनेपाली सेवाको संक्षिप्त परिचयसम्पर्कका लागि

अघिल्ला वर्षभन्दा बढी भेटियो यार्सा

(GMT+08:00) 2017-06-10 14:59:19
 केही वर्ष यता निरन्तर घटिरहेको यार्साको संकलन यो वर्ष भने बढेको छ। अघिल्ला वर्षहरूमा भन्दा यार्सा बढी पाइन थालेपछि संकलकहरू खुसी भएका कान्तिपुर अनलाइनले लेखेको छ। 'चार वर्षजति भयो प्रत्येक साल कम पाइन थालेको थियो,' काँडाका एकजना संकलक रुन्छे बोहराले भन्नुभयो 'यो वर्ष पहिलाभन्दा निकै बढी पाइन थालेको छ।' उत्पादन घट्ने क्रम बढ्दै गएपछि पछिल्ला वर्षमा यार्सा नै नपाइने हो कि भन्ने चिन्तामा रहेका उहाँले खुसी व्यक्त गर्दै भन्नुभयो, 'यो वर्ष 7/8 वर्षअघिको परिमाणमा पाइन थालेको छ।'

यो वर्ष काँडाको राइढुंगी, माझा, फरालखेत, स्यांगवन र सुर्मा गाउँपालिकाअन्र्तगतका जलजला, डाँफेचुली, तपोवन, डाँडा, निलखट्टी, ठाडे, जर्सी, गोलढुंगालगायतका क्षेत्रमा यार्सागुम्बु उल्लेख्य मात्रामा पाइएको संकलकहरूले बताएका छन्। 'गत वर्ष दिनभर खोज्दा पनि धेरै भेट्टाउनेले 20 वटा जति मात्र पाउँथ्यो,' सुर्माका संकलक लखन बोहराले भन्नुभयो, 'यो वर्ष कसैकसैले एक दिनमै 1 सयसम्म किरा भेट्टाए। अघिल्लो वर्षको भन्दा राम्रै पाइन थालेको छ।'

पुस महिनामा नै हिउँ पर्नु र वैशाख महिनासम्म पनि यार्सा संकलन क्षेत्रमा पटकपटक हिमपात भएका कारण यो वर्ष यार्सा सप्रिएको संकलकहरूको अनुमान छ। गत वर्ष बर्खामा वर्षा पनि राम्रै भएकाले यार्सा उत्पादन बढेको हुन सक्ने काँडाका वसन्त बोहराले बताउनुभयो। उहाँले भन्नुभयो, 'बर्खामा खडेरी पर्दा पनि यार्सा राम्रो हुँदैन। ढिलो हिउँ परेको वर्ष पनि कमै पाइन्छ। यो वर्ष बर्खामा पनि टन्न पानी पर्यो। हिउँ पनि समयमै पर्‍यो।' यता जिल्ला वन कार्यालयका कर्मचारीले भने यार्साको उत्पादन बढेको भन्ने सुन्नमा आएको भए पनि के कारणले बढेको हो भने यसै भन्न नसकिने बताए।

सहायक जिल्ला वन अधिकृत कर्णबहादुर खातीले भन्नुभयो, 'समयमै हिउँ पर्नु एउटा कारण हुन सक्छ। तर, पनि त्यस्तो विस्तृत अनुसन्धान नगरिकन के कारणले उत्पादन बढेको भन्न सकिने अवस्था छैन।' आर्थिक वर्षको अन्त्यमा निकासी पुर्जी दिइसकेपछि मात्र अघिल्लो वर्ष र यस वर्षको तुलना गरेर कति परिमाणमा बढ्यो भन्ने कुरा यकिन गर्न सकिने जिल्ला वन कार्यालयले जनाएको छ। पछिल्ला वर्षहरूमा यार्साको उत्पादन निरन्तर घट्दै गएका कारण यार्सा संकलन नै मुख्य आम्दानीको स्रोत भएका जिल्लाको उत्तरी क्षेत्रका बासिन्दाहरूको जीवनशैलीमा व्यापक फेरबदल भइरहेको छ।

मजदुरीका लागि भारत जान पूर्ण रूपमा बन्द भइसकेका काँडा, सुर्मा दौलिचौरलगायतका क्षेत्रबाट पछिल्लो समय मानिसहरू फेरि भारततर्फ जान थालेका थिए। यार्सा उत्पादन घटेपछि कतिपयले यार्साकै आम्दानीबाट सदरमुकामलगायत तराईका जिल्लामा जोडेका घर घडेरीसमेत बिक्री गर्नुपरेको थियो। गत 10 वर्षयताकै सबैभन्दा कम 2 सय 10 किलो यार्सा मात्र बझाङबाट निकासी भएको जिल्ला वन कार्यालयको तथ्यांक छ।

जानकारी तथा लेखहरु