काठमाडौं महानगरपालिकाले सुरु गरेको फोहोरबाट बिजुली निकाल्ने मेसिनको उद्घाटन गरिएको छ।
मेसिनको काठमाडौं महानगरपालिकाका मेयर विद्या सुन्दर शाक्य र नेपालको लागि युरोपियन युनियनकी राजदुत रिन्छे टेरिन्कले संयुक्त रुपमा उद्घाटन गरेका हुन्।
३ वर्ष अवधिको लक्ष्य राखेर सुरु भएको परियोजनामा युरोपियन युनियनको ८० र काठमाडौं महानगरको २० प्रतिशत आर्थिक साझेदारी छ। यो परियोजनाले वार्षिक करिव २ हजार ५ सय टन बराबरको कार्वनडाईअक्साइड ग्यास उत्सर्जनमा कमी हुने अपेक्षा गरिएको छ।
दैनिक ३ मेट्रिक टन जैविक फोहोर मिथानेसन गर्न सक्ने क्षमताको पुर्ण क्रियाशिल उपकरणबाट दैनिक ३ सय किलो जैविक मल, ९६ किलो एलपिजी ग्यास, १४ किलोवाट बिजुली र १३ हजार ५ सय लिटर प्रशोधित पानी उत्पादन हुने महानगरले जनाएको छ। कार्यक्रममा बोल्दै मेयर शाक्यले काठमाडौमा फोहोरको अत्याधिक समस्या रहेकोले मातहतका कर्मचारीलाई बिहान सवेरै फोहोर उठाउन निर्देशन दिएको जानकारी दिनुभयो।