फन्ट डाउनलोड
सि.आर.आइको संक्षिप्त परिचयनेपाली सेवाको संक्षिप्त परिचयसम्पर्कका लागि

'नीति तथा कार्यक्रम सकरात्मक'

(GMT+08:00) 2018-05-22 16:33:56
नेपालको प्रमुख विपक्षी दल नेपाली काँग्रेसले सरकारले पेस गरेको नीति तथा कार्यक्रममाथि सकारात्मक टिप्पणी गरेको छ। नीति तथा कार्यक्रमपछि प्रतिक्रिया दिँदै काँग्रेस नेताहरुले नीति कार्यक्रममा केही त्रृटि भए पनि समग्रमा सकरात्मक भएको टिप्पणी गरेको गोरखापत्र अनलाइनले लेखेको छ।

कांग्रेस महामन्त्री डा. शशांक कोइरालाले सरकारले पेस गरेको कार्यक्रम सकरात्मक भएको टिप्पणी गर्नुभयो। कोइरालाले नीति कार्यक्रममाथि पार्टीको औपचारिक धारणा अध्ययनपछि सार्वजनिक हुने भएपनि कनेक्टिभिटी, स्वास्थ्यलगायतका क्षेत्रमा समेटिएका विषय सकरात्मक भएको बताउनुभयो।

संसदीय दलका उपनेता विजयकुमार गच्छदारले नीति कार्यक्रमप्रति सकरात्मक धारणा राख्नुभयो। गच्छदारले कार्यक्रमलाई व्यवहारमा कसरी लागू गर्ने भन्ने मात्र मूल प्रश्न रहेको भन्दै समेटिएको विषय ससर्ती हेर्दा राम्रा रहेको बताउनुभयो। उहाँले सरकारले गरेको प्रतिवद्धतालाई बजेट कसरी सम्बोधन गर्छ भन्ने विषय महत्वपूर्ण रहेको बताउनुभयो। कृषि र सिँचाइका क्षेत्रमा केही विषय छुटेकोमा पनि गच्छदारले सरकारको ध्यानाकर्षण गराउनुभयो।

कांग्रेस नेता ज्ञानेन्द्रबहादुर कार्कीले धेरै विषय सकरात्मक रहे पनि कतिपय विषय छुटेको र अस्पष्ट रहेको बताउनुभयो। नीति तथा कार्यक्रमका कतिपय विषय कसरी सम्बोधन गर्ने भन्ने स्पष्ट नभएको कार्कीको भनाई छ। उहाँले नीति तथा कार्यक्रमलाई मिठो निवन्धको संज्ञा दिनुभयो।

तर, कांग्रेस नेता डा. नारायण खड्काले भने कार्यक्रम असपष्ट रहेको बताउनुभयो। उहाँले कार्यक्रमलाई बजेटमा कसरी आउँछ भन्ने महत्वपूर्ण विषय भएको बताउनुभयो। खड्काले लक्ष्य हासिल कसरी गर्ने भन्ने विषयमा नीति कार्यक्रम मौन रहेको बताउनुभयो।

पूर्वप्रधानमन्त्री डा. बाबुराम भट्टराईले भने नीति कार्यक्रम ठीकै भएको प्रतिक्रिया दिनुभयो। भट्टराईले नीति कार्यक्रममा के गर्ने भन्ने विषय समेटिए पनि कतिपयमा कसरी गर्ने भन्ने विषय नसमेटिएको बताउनुभयो।

उहाँले वित्तीय संघीयताको मर्म अनुसार भने नीति कार्यक्रम पेस हुन नसकेको बताउनुभयो। भट्टराईले नीति कार्यक्रमलाई बजेटले कसरी सम्बोधन गर्छ भन्ने महत्वपूर्ण विषय भएको बताउनुभयो।

एमाले नेता सुरेन्द्र पाण्डेले यसअघि वाम दलले अघि सारेको घोषणापत्रमा आधारित भएर नीति कार्यक्रम आएको बताउनुभयो। पाण्डेले नीति कार्यक्रम सकारात्मक भए पनि कार्यान्वयनको पाटो महत्वपूर्ण रहेको बताउनुभयो।

जानकारी तथा लेखहरु