फन्ट डाउनलोड
सि.आर.आइको संक्षिप्त परिचयनेपाली सेवाको संक्षिप्त परिचयसम्पर्कका लागि

स्वच्छ वातावरण सबैको दायित्व भएको नेपालका प्रधानमन्त्रीको भनाइ

(GMT+08:00) 2018-06-05 14:17:03

नेपालका प्रधानमन्त्री केपी शर्मा ओलीले आर्थिक समृद्धि हासिल गर्ने दिशामा द्रूतगतिका साथ अग्रसर हुँदा वातावरण प्रदूषण एउटा साझा चुनौतीका रुपमा देखा पर्न सक्ने औँल्याउनु भएको छ। विश्व वातावरण दिवसका अवसरमा आज जुन पाँच तारिख मंगलबार एक सन्देश जारी गर्दै उहाँले वातावरण संरक्षणमा सबैले उत्तिकै जिम्मेवार भएर सोच्न र त्यसअनुसार काम गर्न जरुरी रहेको बताउनु भएको राष्ट्रिय समाचार समितिले लेखेको छ।

आजको दिनले वातावरण संरक्षणको कुनै न कुनै भूमिकामा संलग्न हुन हरेक नेपालीलाई उत्प्रेरणा मिल्ने विश्वास व्यक्त गर्दै प्रधानमन्त्री ओलीले स्वच्छ वातावरण भावी पुस्ताको अधिकारको विषय भएको हुँदा उनीहरुलाई स्वच्छ वातावरण हस्तान्तरण गर्नु हामी सबैको दायित्व रहेको बताउनुभयो। सामाजिक, आर्थिक परिवेशका साथै पर्यावरणीय सन्तुलनलाई समेत ख्याल गरी विकास निर्माणको कार्य अगाडि बढाउन आवश्यक रहेको उहाँको भनाइ छ।

देशभरिका जनसमुदायको सहभागितामा हरियाली प्रवद्र्धन, प्रदूषण नियन्त्रण र सरसफाइ अभियान सुरु भएको देख्दा आफूलाई खुशी लागेको उल्लेख गर्दै उनले स्वच्छ वातावरण महाअभियानमा सहभागी हुन पाउँदा अत्यन्त हर्षित भएको बताउनुभयो।

प्रधानमन्त्री ओलीले वातावरण दिवसका अवसरमा वन तथा वातावरण मन्त्रालयले आह्वान गरेको स्वच्छ वातावरण महाअभियान–२०७५ मा सहभागी भएर आआफ्नो क्षेत्रबाट सहयोग पुर्‍याउन आह्वान गर्नु भएको छ।

'वातावरणीय प्रभाव मूल्याङ्कन बिनागरिने विकास प्रयास दिगो हुँदैन। अव्यवस्थित विकासले रोगव्याधि र अस्वस्थ अवस्था मात्र निम्त्याउँदैन, त्यस्तो अव्यवस्थाले बाढीपहिरो, सुक्खालगायतका ठूलो धनजनको क्षति हुने प्रकोपको सम्भावनासमेत बढाउँछ' उहाँले भन्नुभयो। वातावरणको विनाश नहुने गरी नाप नक्सा तयार गर्दै वातावरणमैत्री प्रविधिको प्रयोग गर्न पनि प्रधानमन्त्री ओलीले आह्वान गर्नु भएको छ।

संयुक्त राष्ट्रसंघको साधारणसभाले सन् १९७२ मा हरेक वर्षको जुन ५ तारिखका दिन 'विश्व वातावरण दिवस' मनाउने घोषणा गरेको थियो। यस वर्षको विश्व वातावरण दिवसको नारा 'प्लास्टिक प्रदूषणमाथि प्रहारः सके पुनःप्रयोग नसके बहिष्कार' रहेको छ।

जानकारी तथा लेखहरु