कर्णाली प्रदेश सरकारका मुख्यमन्त्री महेन्द्रबहादुर शाहीले आफ्नो पहिलो चीन भ्रमण उपलब्धिमूलक भएको बताएका छन्। राससका अनुसार, साताव्यापी चीन भ्रमणपश्चात् शनिबार सुर्खेत आएका मुख्यमन्त्री शाहीले पत्रकारसँग कुराकानी गर्दै चीन भ्रमण द्विपक्षीय हित र प्रदेशको विकासका लागि उपलब्धिमूलक भएको बताएका छन्।
भ्रमण अन्तर्राष्ट्रिय लगानीको वातावरण बनाउन निकै फलदायी भएको र हिल्सा–जमुनाहा द्रुतमार्ग निर्माणका लागि चाइना रेलवे कम्पनीसँग सम्भाव्यता अध्ययन गर्न प्रारम्भिक सहमति भएको बताएका छन्। हिल्सा–जमुनाहा द्रुतमार्ग कर्णाली विकास र समृद्धिको मेरुदण्ड भएको उल्लेख गर्दै उनले यसलाई प्रदेश सरकारले पहिलो प्राथमिकतामा राखेको बताए। मुख्यमन्त्री शाहीले भ्रमणका क्रममा कर्णाली एयरलाइन्स स्थापना, पर्यटन पूर्वाधारको विकास, जडीबुटी प्रशोधन, जलविद्युत् विकास, आन्तरिक तथा प्रादेशिक विमानस्थल निर्माणलगायतका महत्वपूर्ण विषयमा त्यहाँका प्रान्तीय सरकार तथा लगानीकर्तासँग छलफल भएको बताए।
यसैगरी द्विदेशीय सीमा नाका निर्माणका बारेमा पनि चिनियाँ प्रतिनिधिमण्डलसँग छलफल भएको बताए। सछ्वान प्रान्तका गभर्नर यिन लिको औपचारिक निमन्त्रणामा गतसाता चार सदस्यीय टोलीसहित चीन प्रस्थान गरेका मुख्यमन्त्री शाही त्यहाँ सम्पन्न १७ औं वेष्टर्न चाइना इन्टरनेश्नल फेयर तथा बेल्ट एण्ड रोड डेभलेपमेन्ट कन्फेरेन्समा सहभागी भएका थिए।
