फन्ट डाउनलोड
सि.आर.आइको संक्षिप्त परिचयनेपाली सेवाको संक्षिप्त परिचयसम्पर्कका लागि

चीनमा कृषि पढ्नेको कोटा बढाउन कृषिमन्त्रीको आग्रह

(GMT+08:00) 2019-02-01 16:13:01

नेपालका कृषि तथा पशुपन्छी विकास मन्त्री चक्रपाणि खनालले चीनमा कृषि पढ्न जाने विद्यार्थीको कोटा बढाउन चीन सरकारसँग आग्रह गर्नु भएको छ। नेपालका लागि चिनियाँ राजदूत हौ यान्छीसँग हिजो बिहीबार मन्त्रालयमा भएको भेटमा उहाँले अहिले निकै थोरै संख्यामा नेपाली विद्यार्थी कृषि पढ्न चीन जाने गरेको भन्दै संख्या बढाउन आग्रह गर्नु भएको अनलाइन खबरले लेखेको छ।

चीनका विश्वविद्यालयमा पढ्न जाने विद्यार्थीको संख्या बढाउन सके अन्य मुलुकमा रोजगारी गर्न जानेको संख्या घट्ने र त्यसले कृषिलाई नै टेवा पुर्‍याउने मन्त्री खनालको विश्वास छ। नेपालका हिमाली र पहाडी जिल्लामा प्रयोग हुने कृषि औजारहरु चीनमै बनेका हुने भएकाले त्यसको अध्ययनका लागि पनि पढाइ र तालिम फलदायी हुने मन्त्री खनालको भनाइ छ।

उहाँले नेपालका कृषकका लागि आधुनिक कृषि तामिलको व्यवस्था गर्न पनि आग्रह गर्नु भएको छ। चीनले नेपालको कृषि क्षेत्रको अनुसन्धान र प्रविधि विस्तारमा सहयोग गर्ने गरी यसअघि नै (पुष ४ गते) सहमति भइसकेको छ। उक्त परियोजनाका लागि नेपालका किसान र प्राविधिक कर्मचारीका लागि ६० जनालाई चीन लगेर र अन्य २४० जना किसानलाई नेपालमै तालिम दिइने सहमति भएको थियो।

जवाफमा राजदूत हौले थप छलफल गरेर छिट्टै नेपालले प्रस्ताव गरेअनुसार सहमति गर्ने बताउनुभयो। उहाँले नेपाल र चीनबीच पुरानो मैत्रीपूर्ण सम्बन्ध रहेको भन्दै आफ्नो कार्यकालमा त्यसलाई थप उचाइमा पुर्‍याउने प्रतिवद्धता जनाउनुभयो। चीनले कृषि र प्रविधिमा निकै फड्को मारेको सुनाउँदै राजदूत हौले एक असल छिमेकीको नाताले त्यो सीप नेपालका लागि पनि फलदायी हुने बताउनुभयो।

जानकारी तथा लेखहरु