नेपालले मंगलबार रातिदेखि मर्स्याङ्दी जलविद्युत् आयोजनाको बिजुली पनि भारतमा बेच्न थालेको छ। मर्स्याङ्दीसहित विभिन्न ४ वटा आयोजनाबाट ५६ सय मेगावाट आवर (करिब २ सय ३४ मेगावाट) बिजुली भारतमा बेचिरहेको नेपाल विद्युत् प्राधिकरणका प्रवक्ता सुरेश भट्टराइले जानकारी दिनुभयो। त्यस्तै, बिहीबारबाट मध्यमर्स्याङ्दी आयोजनाको बिजुली पनि भारतमा बेच्नका लागि आज बोलकबोलमा भाग लिन लागिएको उहाँको भनाइ छ ।

यसअघि नेपालले गत शनिबार रातिदेखि कालीगण्डकी आयोजनाको १४० मेगावाटसहित कुल १७७.७ मेगावाट बिजुली भारत निर्यात गर्ने थालिसकेको थियो । मर्स्याङ्दी थपिएसँगै करिब २ सय ३४ मेगावाट बिजुली भारत जान थालेको हो । नेपालले इन्डियन इनर्जी एक्स्चेन्ज’ (आईईएक्स) मा बिजुली बेच्नका लागि गतवर्ष कात्तिकमा अनुमति पाएको थियो । गतवर्ष त्रिशूली र देवीघाट जलविद्यु्त् आयोजनाको मात्रै बिजुली भारतले किनेकोमा अहिले मर्स्याङ्दी, मध्यमर्स्याङ्दी, कालीगण्डकी र लिखुसमेत गरी कुल ३६४ मेगावाट बिजुली किन्नका भारतले सहमति दिएको छ । लिखुको बिजुली बेच्नका लागि नेपालले अनुमति पाएको भए पनि बेच्न भने थालिसकेको छैन ।

नेपालले बिजुली बेच्न प्रस्ताव गरेका अरु तीन आयोजना माथिल्लो तामाकोसी, माथिल्लो भोटेकोसी र चमेलियाको बिजुली किन्नका लागि भने भारतले हालसम्म स्वीकृति दिएको छैन। केही समयअघि भारतबाट बिजुली नपाएर औद्योगिक ग्राहकको लाइन काटेको प्राधिकरणले अहिले फेरि भारतलाई बिजुली बेच्न थालेको हो, कान्तिपुर अनलाइनमा खबर छ।