असार २ गतेदेखि ‘नेपाल चेम्बर एक्स्पो २०२२’
2022-06-09 16:07:26CRI
Share with:

नेपाली उत्पादनहरूको बजारीकरण, व्यापारिक अन्तरक्रिया, आयातनिर्यातको सूचना आदानप्रदानमा विशेष जोड दिँदै पाँचौं संस्करणको नेपाल चेम्बर एक्स्पो २०२२ आयोजना गरिने भएको छ। नेपाल चेम्बर अफ कमर्शद्वारा वाणिज्य मन्त्रालय एवं व्यापार तथा निकासी प्रवर्द्धन केन्द्रको सहकार्यमा आगामी असार २ देखि ६ गतेसम्म प्रदर्शनी मार्गस्थित भृकुटीमण्डप प्रदर्शनी कक्षमा एक्स्पो आयोजना गर्न लागिएको हो।

 

राष्ट्रको सर्वाङ्गीण विकासका लागि निजी क्षेत्रको सक्रिय सहभागिता अपरिहार्य रहेकाले एक्स्पो आयोजना गरिँदै आइएको चेम्बरले जनाएको छ। चेम्बर अफ कमर्शले मेलाको पाँचौ संस्करणमा व्यापारिक अन्तरक्रिया, आयातनिर्यातको सूचना आदानप्रदान र नेपाली उत्पादनको बजारीकरणमा विशेष जोड दिएको जनाएको छ।

एक्स्पोमा अटोमोबाइल, इलेक्ट्रिकल एण्ड इलेक्ट्रोनिक्स, फ्लोरिङ एण्ड फर्निसिङ, होम एप्लाइन्सेस, फेसन वेयर एण्ड एसेसरिज, गार्मेन्ट एण्ड टेक्सटाइल, मोबाइल एण्ड ग्याजेट्स, एफएमसिजी, हाइड्रो, लजिस्टिक, ह्याण्डिक्राफ्ट एण्ड ह्याण्डलुमस, सुज एण्ड लेदर आइटम, कस्मेटिक्स, फुड एण्ड डेरी प्रडक्ट्स लगायतका १५० वटा स्टलहरू रहने नागरिकन्यूज डटकमले जनाएको छ। राष्ट्रिय एवं अन्तर्राष्ट्रिय कम्पनीहरू तथा उद्योगी व्यवसायीहरूको सहभागिता रहने एक्स्पो नेपाल लगायत भारत, पाकिस्तान, बङ्गलादेश तथा अन्य मुलुकमा उत्पादित सामग्रीहरू पनि रहने आयोजक पक्षले जनाएको छ।