काठमाडौं/तराई–मधेस द्रुतमार्ग (फास्ट ट्र्याक) निर्माण थालेको ५ वर्षमा भौतिक प्रगति १९.८३ प्रतिशत मात्र छ । नेपाली सेनाको निर्माण व्यवस्थापन रहेको आयोजना निर्माण समय ०८०/८१ सम्म मात्र छ । आयोजनामा अहिलेसम्म ३२ अर्ब रुपैयाँ खर्च भइसकेको छ । यसको कार्यप्रगति भने सोचेअनुरूप छैन ।
आयोजनालाई आगामी आर्थिक वर्षका लागि ३० अर्ब ७ करोड रुपैयाँ बजेट छुट्याइएको छ । संसद्मा बजेट प्रस्तुत गर्ने क्रममा अर्थमन्त्रीले आगामी ३ वर्षभित्र सम्पन्न गर्ने भन्दै उक्त बजेट छुट्याएको बताएका थिए । सुरुङ निर्माणको जिम्मा पाएका चाइना स्टेट कन्स्ट्रक्सन इन्जिनियरिङ कर्पोरेसन र पोली चङ्दा इन्जिनियरिङ कर्पोरेसनलाई छिटो र गुणस्तरीय काम नगरेको भन्दै निलम्बन गरिएको छ ।
कान्तिपुर अनलाइनका अनुसार पहिलो प्याकेजमा चाइना स्टेट र दोस्रो प्याकेजमा पोली चङ्दाले काम गरिरहेका थिए । ३ वर्षभित्र निर्माण सक्ने गरी ०७८ वैशाख ३१ मा दुवै कम्पनीसँग ठेक्का सम्झौता भएको थियो । यही बेला सरकारले चारवटा नयाँ द्रुतमार्ग निर्माण गर्ने घोषणा गरेको छ । सरकारले आगामी आर्थिक वर्ष ०७९/८० को बजेटमार्फत काठमाडौंदेखि चितवन एक घण्टामा पुग्न सकिने भन्दै द्रुतमार्ग निर्माण गर्ने महत्त्वाकांक्षी योजना अघि सारेको छ । द्रुतमार्गले चन्द्रागिरि, चित्लाङ, पालुङ हुँदै चितवनलाई जोड्ने जनाइएको छ । त्यसबाहेक चितवन–रामपुर–बुटवल, चितवन–रामपुर–पोखरा र मिर्चैया–लुक्ला–सगरमाथा गरी थप तीन वटा द्रुतमार्ग निजी क्षेत्रको लगानीमा निर्माण गर्ने गरी सरकारले योजना अघि सारेको छ । यसका लागि लगानी बोर्डमार्फत निर्माण प्रक्रिया अघि बढाइने अर्थमन्त्री जर्नादन शर्माले बताउनुभयो।
पूर्वसचिव तुलसी सिटौला भने चितवन पुग्न द्रुतमार्ग नै निर्माण गर्न आवश्यक नपर्ने तर्क गर्नुहुन्छ। सरकारले स्रोत पहिचान गरी प्राथमिकतामा राख्न सके मात्र यो द्रुतमार्ग निर्माणमा जान सक्ने उहाँको भनाइ छ । नागढुंगा–सिस्नेखोला सुरुङमार्ग निर्माणाधीन छ । द्रुतमार्ग निर्माणको कुरा अवधारणा मात्र रहेको भौतिक पूर्वाधार तथा यातायात मन्त्रालयका योजना अनुगमन तथा मूल्यांकन महाशाखाका प्रमुख शिवप्रसाद नेपाल बताउनुहुन्छ। यात्रा समय घटेपछि यातायात खर्च पनि घट्ने उहाँको भनाइ छ । ‘यस योजनामा निजी क्षेत्रलाई सहभागी गराउने भनिएको छ, नयाँ कानुन र नियमावली बनाएर मात्र यो कार्यान्वयनमा जानेछ,’ नेपालले भन्नुभयो, ‘सडक विभाग आफैंले द्रुतमार्ग बनाउने भनेर बजेट छुट्याइएको होइन ।’
