श्रमस्वीकृति लिने नेपालीको सङ्ख्या पाँच वर्षयताकै उच्च
2022-06-19 16:19:22cri
Share with:

चालु आर्थिक वर्षको ११ महिनामा श्रमस्वीकृति लिएर विदेश जाने नेपाली श्रमिकको संख्या ५ लाख ५५ हजार पुगेको छ। यो संख्या आर्थिक वर्ष २०७४-०७५ पछिको सबैभन्दा बढी हो। यो संख्या गत वर्षको सोही अवधिको तुलनामा भने तेब्बर बढी हो। गत वर्षको ११ महिनामा १ लाख ४६ हजार युवाले विदेशमा रोजगारीमा जाने जनाउँदै श्रमस्वीकृति लिएका थिए। कोभिड खोपको पहुँच र स्वास्थ्य मापदण्डमा आएको सुधारका कारण कोरोना संक्रमणका बीच समेत नेपालबाट वैदेशिक रोजगारीमा जाने नेपालीको संख्या उल्लेख्य वृद्धि भएको कारोबार अनलाइनले लेखेको छ। गत वर्षको यही अवधिको तुलनामा चालु आवको चैतसम्म लगभग तेब्बरभन्दा बढीले वृद्धि भएको वैदेशिक रोजगार विभागको तथ्यांकमा उल्लेख छ। गत वर्षको चैतसम्म १ लाख ४६ हजार ४० रहेकोमा चालु आवमा ५ लाख ५५ हजार ५७३ युवाले श्रमस्वीकृति लिएको वैदेशिक रोजगार विभाग ताहाचल कार्यालयका कम्प्युटर इन्जिनियर अर्जुन यादवले जानकारी दिनुभयो।

चालु आवको पुस महिनामा वैदेशिक रोजगारीका लागि श्रमस्वीकृति लिने युवाको संख्या हालसम्मकै उच्च देखिएर बीचको २ महिना केही घटेर चैतमा पुनः बढेको छ। कोरोना संक्रमणको तेस्रो लहरपछि चैतमा सबैभन्दा बढी युवाले श्रमस्वीकृति लिएको पाइएको छ। चालु आर्थिक वर्षको साउन महिनामा २३ हजार ३७ ले विदेश जान श्रमस्वीकृति लिएकोमा यो संख्या चैतमा ५२ हजार पुगेको छ। विगत २ वर्षदेखि न्यून रहेको वैदेशिक रोजगारीको श्रमस्वीकृति चालु आवको ११ महिनासम्म आउँदा ५ वर्षयताकै उच्च देखिएको हो। गत आवको पहिलो ११ महिनाको तुलनामा चालु आवको सोही अवधिमा वैदेशिक रोजगारीमा जान श्रमस्वीकृति लिने श्रमिकको संख्या ३ गुणाले बढ्नु रेमिट्यान्स वृद्धिको सकारात्मक संकेत हो।
कोरोनाविरुद्धको खोप सहज व्यवस्थापन भएपछि नेपालबाट रोजगारीका लागि जान श्रमस्वीकृति लिने युवाको संख्या यो वर्ष भने घटेको छैन। तर पुनः कोरोनाको तेस्रो लहर सुरु भएका कारण श्रमस्वीकृति लिनेको संख्या माघ र फागुनमा भने सामान्य घटेको पाइएको थियो। कोरोनाको तेस्रो लहरमा कतिपय रोजगारदाताले नेपाल पठाएको मागपत्र रद्द गरेका कारण बीचमा श्रमस्वीकृतिको संख्या घटेको विज्ञको भनाइ छ। तर जेठ महिनामा भने श्रमस्वीकृति लिनेको संख्या वैशाखको तुलनामा बढेको छ। वैशाखमा ४५ हजार रहेको श्रमस्वीकृति संख्या जेठमा ५७ हजार पुगेको छ।
बीचमा २ वर्ष मन्द रहेको वैदेशिक रोजगारी चालु आर्थिक वर्षको पुससम्म निरन्तर बढेको तथ्यांकले पुनः लयमा फर्कने संकेत गरेको छ। कोरोना संक्रमण अघि मासिक ४० हजारको हाराहारीमा युवा वैदेशिक रोजगारीमा जाने गरेकोमा चालु आवको औषत ५० हजार भन्दा बढी रहेको छ। कोरोना संक्रमणअघिको सामान्य अवस्थामा मासिक रुपमा ४० हजार युवा वैदेशिक रोजगारीमा जाने गरेका थिए। चालु आवको चैतमा आएर वैदेशिक रोजगारीमा जानेको संख्या बिगतको सामान्य अवस्थामा भन्दा बढी पुगेको छ। विभागका काठमाडौं कार्यालय ताहाचलका अनुसार कोरोना संक्रमणदरमा कमी आएपछि वैदेशिक रोजगारीमा जान समग्र श्रमस्वीकृति लिनेको संख्या बढेको छ। कार्यालयका अनुसार राजधानीसहित देशभरका ७ श्रम कार्यालयबाट श्रमस्वीकृति लिने व्यवस्था अनलाइनमार्फत गरेका कारण श्रमिकलाई सेवा लिन सहज समेत भएको छ।
सरकारले वैदेशिक रोजगारीमा जाने युवाका लागि कोरोनाविरुद्धको खोप व्यवस्थापन गरेपछि पछिल्लो समय करार रद्द गरेर आएका श्रमिक पनि पुनः वैदेशिक रोजगारीमा नै जाने प्रवृत्ति बढ्दै गइरहेका कारण पनि श्रमस्वीकृतिको संख्यामा वृद्धि भएको हो। नेपाल र नेपाली युवाको प्रमुख आयस्रोतको रुपमा रहेको वैदेशिक रोजगार विगत ३ वर्ष घटेर पुनः बढ्ने क्रममा रहेको छ। विगत ३ आर्थिक वर्षमा प्रमुख श्रम गन्तव्यमा रोजगारीमा जाने युवाको संख्या क्रमशः घट्दो दर रहेको पाइएको थियो।