पर्यटन क्षेत्रको दिगो विकासका लागि नेपाल सरकारले सन् २०२३ देखि २०३३ को दशकलाई ‘नेपाल भ्रमण दशक’को रूपमा मनाउन आवश्यक तयारी अगाडि बढाउने कार्ययोजना ल्याएको छ। कोभिड–१९का कारण सन् २०२० देखि गिरावट आएको पर्यटन क्षेत्रको पुनरुत्थान गर्न सरकारले ७४ बुँदे कार्ययोजना सार्वजनिक गरेको कारोबार अनलाइनले लेखेको छ।
पर्यटक आगमन बढाउन र पर्यटन उद्योगको विकासका लागि भ्रमण दशकको अवधारणा ल्याइएको संस्कृति पर्यटन तथा नागरिक उड्डयनमन्त्री जीवनराम श्रेष्ठले बताउनुभयो। यसका लागि प्रधानमन्त्री तथा मन्त्रिपरिषद्को कार्यालय, नेपाल पर्यटन बोर्ड तथा अन्य सम्बन्धित मन्त्रालयको सहयोगमा ३ महिनाभित्र आवश्यक तयारी गरेर प्रक्रिया आगाडि बढाउने कार्ययोजनामा उल्लेख छ।
सरकारले पर्यटन क्षेत्रको पुनरुत्थानका लागि अल्पकालीन, मध्यकालीन र दीर्घकालीन कार्ययोजना ल्याएको हो। आइतबार मन्त्री श्रेष्ठले कार्ययोजना कार्यान्वयनको समय सीमासमेत तोकिएको जानकारी दिनुभयो। उहाँले भन्नुभयो, “यसभन्दा अगाडि गठन भएका अध्ययन कार्यदलले दिएका सुझाव पनि समेटेर कार्ययोजना ल्याइएको हो। सरकार र पर्यटन क्षेत्रसँग सम्बन्धित विभिन्न निकायहरुको सहकार्यमा कार्ययोजना अगाडि बढ्नेछ।”
सरकारले आर्थिक वर्ष २०७९/०८० को बजेट वक्तव्यमार्फत १० लाख पर्यटक भित्र्याउने गरी कार्यक्रम सञ्चालन गर्ने, होटललगायत पर्यटन क्षेत्र सम्बद्ध व्यवसायको वार्षिक इजाजत र नवीकरण दस्तुरमा छुट दिने, पर्यटन क्षेत्रको पुनरुत्थानका लागि प्रवाह हुने सहुलियतपूर्ण कर्जालाई निरन्तरता दिने, प्रदेश सरकार र निजी क्षेत्रको सहकार्यमा पहाडी तथा हिमाली क्षेत्रमा मनोरञ्जनात्मक तथा साहसिक पर्यटनको हिल स्टेसन विकास गर्ने योजना ल्याएको छ।
साथै छिमेकी मुलुकबाट पर्यटक वृद्धि गर्न मेला तथा रोड शोजस्ता कार्यक्रम नेपाल पर्यटन बोर्डबाट सञ्चालन गर्ने, सगरमाथा क्षेत्रमा पर्वतारोहण अनुसन्धान केन्द्र र शेर्पाहरुको साहसिक पहिचान झल्किने संग्रहालय स्थापना गर्ने बजेटमा उल्लेख छ। त्यसैगरी प्रमुख पर्यटकीय क्षेत्रहरुमा सडक, खानेपानी, शौचालय, नि:शुल्क इन्टरनेट सेवालगायत सुविधा विस्तार गर्ने, गौतमबुद्ध र पोखरा अन्तर्राष्ट्रिय विमानस्थल पूर्ण रुपमा सञ्चालनमा ल्याउने लगायत पर्यटन क्षेत्रको विकास र प्रवद्र्धनका कार्यक्रम पनि अगाडि सारिएको छ। बजेटका कार्यक्रमहरुलाई समेटेर सरकारले कार्ययोजना बनाएको हो। हाल बन्द रहेको अन्तर्राष्ट्रिय विमानस्थलमा ड्युटी फ्रि सप सुरु गर्ने, सगरमाथा संवाद कार्यक्रम सञ्चालन गर्ने, काठमाडौं उपत्यकामा ऐतिहासिक तथा पुरातात्विक सम्पदा जोड्ने गरी सम्पदा मार्ग निर्माण गर्ने कार्ययोजनामा उल्लेख छ।
काठमाडौं उपत्यकाभित्र रात्रिकालिन पर्यटनको प्रारम्भ र प्रवद्र्धन गर्ने अवधारणाअनुरुप काठमाडौं, पाटन, भक्तपुर र कीर्तिपुरमा रात्रिकालिन सम्पदा यात्राको शुरुवात गरिने कार्ययोजनामा उल्लेख छ। यसैगरी सरकारले ६ महिनाभित्र नेपालमा युएनडब्लुटीओ एसिया प्यासिफिक क्षेत्रको उच्चस्तरीय टुरिजम समिट आयोजना गर्ने योजना अगाडि सारेको छ। कार्ययोजनामा गैरआवासीय नेपाली संघको नेतृत्वमा एक नेपाली एक विदेशी साथी नेपाल पठाऊ अभियान सञ्चालन लगायतका पर्यटन प्रवद्र्धनका विविध कार्यक्रम सञ्चालन गर्न मन्त्रालय र गैरआवासीय नेपाली संघबीच समझदारी गरिने उल्लेख छ।
साथै ४ महिनाभित्र अन्नपूर्ण आधार शिविरमा दक्षिण एसिया तथा प्रशान्त क्षेत्रका पर्यटनमन्त्रीहरुको अन्तर्राष्ट्रिय सम्मेलन आयोजनाका लागि पहल गरिने भएको छ। हिमाल आरोहणका लागि ५ हजार ८ सय मिटरदेखि ८ हजार मिटरसम्मका थप हिमचुलीहरुको आरोहण खुला गर्ने, भारतीय र बंगलादेशी नागरिकमा लोकप्रिय गन्तव्यका रुपमा रहेका चितवन, पोखरालगायत गन्तव्यलाई वेडिङ र अन्य सेरेमोनियल डेस्टिनेसनका रुपमा विकास गर्ने कार्ययोजना रहेको छ।
