पोखरामा आउने पर्यटकको बसाइ अवधि लम्ब्याउन आवश्यक रहेको पर्यटन व्यवसायीले बताएका छन्।  कोरोना महामारीले थला परेको पोखराको पर्यटन क्षेत्र तङ्ग्रिन थालेको अवस्थामा पोखराको नयाँनयाँ पर्यटकीय गन्तव्य पहिचान र विकास गर्नुपर्ने उहाँहरुको जोड छ।

पोखरा महानगरपालिकाका प्रमुख धनराज आचार्यको स्वागत गर्न होटल सङ्घले पोखरामा आयोजना गरेको कार्यक्रममा उहाँहरूले महानगर र सङ्घको सहकार्य र साझेदारीमा पोखरामा आउने पर्यटकको बसाइ अवधि लम्ब्याउन सकिने बताउनुभयो । महानगर प्रमुख धनराज आचार्यले यसअघिका बजेटमा पर्यटन क्षेत्रका लागि थोरै बजेट विनियोजन हुँदै आएकामा चालू आर्थिक वर्षको बजेटमा ५८ करोड रुपियाँ विनियोजन गरिएको जानकारी दिनुभयो ।

सडक विस्तारलगायतका कारणले पोखरा र वरपरका पर्यटकीय गन्तव्य मासिँदै गएको चर्चा गर्दै उहाँले भन्नुभयो, “नयाँ गन्तव्य खोजी गर्नुपर्छ र पोखरा भ्रमणमा आउने पर्यटकको बसाइ दुई दिनबाट बढाएर पाँच दिन बनाउनुपर्छ।” यसका लागि महानगर र व्यवसायी मिलेर अगाडि बढ्न सकिने उहाँले बताउनुभयो । लेकसाइडलगायत सिङ्गो पोखराको सुरक्षा, पार्किङ व्यवस्थापन, ट्याक्सीमा मिटर जडान, प्रदूषण नियन्त्रण र फोहोर व्यवस्थापनको विषयमा समेत महानगर सचेत रहेको प्रमुख आचार्यले जानकारी दिनुभयो । पोखरा महानगरभित्र सानो रिङरोड छुट्याएर त्यसको सौन्दर्यीकरण गर्ने तथा ट्राफिक बत्ती र सीसीटीभी क्यामरा व्यवस्थाका लागिसमेत महानगरले काम अगाडि बढाउने उहाँले जानकारी दिनुभयो।

सङ्घ अध्यक्ष लक्ष्मण सुवेदीले पोखरा आउने पर्यटकमध्ये ४० प्रतिशत आन्तरिक पर्यटक रहेको जानकारी दिनुभयो। उहाँले कोभिड–१९ का कारण पर्यटन क्षेत्रका हजारौं मजदुर र व्यवसायी विस्थापित भएको बताउनुभयो।

पछिल्लो समय पोखरा आउने पर्यटक घटे पनि आगामी सेप्टेम्बर महिनादेखि पर्यटक आगमन बढ्ने आशा उहाँले व्यक्त गर्नुभयो । सुवेदीले पोखरामा नयाँ गन्तव्य, पर्यटक सङ्ख्या र उनीहरूको बसाइ अवधि बढाउन सङ्घ महानगरसँग हातेमालो गरेर अगाडि बढ्न तयार रहेको बताउनुभयो ।

नेपाल पर्यटन बोर्डका पूर्वसदस्य एवं सङ्घका सल्लाहकार विश्वशङ्कर पालिखेले पोखरामा बन्दै गरेको नयाँ विमानस्थलबाट कुनकुन विमान कम्पनीले सेवा दिने हो भन्ने विषयमा पूर्वतयारीका लागि वायुसेवा सञ्चालक सङ्घ नेपालसँग छलफल र सहकार्य गरिनुपर्ने सुझाव दिनुभयो।

विमानस्थलको धावनमार्ग दुई हजार पाँच सय मिटरबाट विस्तार गरी तीन हजार मिटर बनाइनुपर्ने र क्यासिनो सुरु गर्नुपर्ने सुझाव उहाँले दिनुभयो । होटल सङ्घ नेपाल गण्डकी अध्यक्ष हरि शर्मा गैरेले महानगरका कर्मचारीको व्यवहार सुधार गर्दै घुसखोरी र भ्रष्टाचार अन्त्य गर्न महानगर प्रमुख आचार्यलाई सुझाव दिनुभयो । यस्तै महानगरमा पर्यटनका लागि अलग शाखाको व्यवस्था र पोखरा दृश्यावलोकनका लागि एकद्वार प्रणालीको व्यवस्थाका लागिसमेत उहाँले बताउनुभयो । हानका सदस्य एवं होटल सङ्घ पोखरा नेपालका सल्लाहकार भरतराज पराजुलीले नयाँ विमानस्थलबाट पोखराको मुख्य सहरी क्षेत्रसम्म फराकिलो र व्यवस्थित सडक निर्माण गरिनुपर्ने बताउनुभयो। गोरखापत्र।