चीनसँग आर्थिक संलग्नता र साझेदारी निर्माण गर्न चाहन्छौँ : प्रधानमन्त्री दाहाल
2023-04-29 15:59:38CRI
Share with:

नेपालका प्रधानमन्त्री पुष्पकमल दाहाल ‘प्रचण्ड’ ले नेपालले चीनसँग गहिरो आर्थिक संलग्नता र साझेदारी निर्माण गर्न चाहेको बताउनुभएको छ। शुक्रबार काठमाडौंमा चीन सरकारले निर्माण गरेको निजामति कर्मचारी अस्पतालको नयाँ सर्जिकल भवन र पुरानो भवनको पुनर्निर्माणसहितको हस्तान्तरण समारोहमा बोल्नुहुँदै प्रधानमन्त्रीले यस्तो बताउनुभएको गोरखापत्र अनलाइनले लेखेको छ।

चीनले चिकित्सा विज्ञान र प्रविधिसहितको सामाजिक–आर्थिक विकासमा ठूलो फड्को मारेको भन्नुहुँदै प्रधनमन्त्री प्रचण्डले विकासका परिणामहरू प्रदान गर्न र नेपाली जनताको समृद्धि हासिल गर्न चीनसँग मिलेर काम गर्ने आकांक्षा रहेको बताउनुभयो।

उहाँले भन्नुभयो, ‘‘नजिकको छिमेकी, असल मित्र र भरपर्दो साझेदारका रूपमा नेपालले चीनसँग गहिरो आर्थिक संलग्नता र साझेदारी निर्माण गर्न चाहन्छ। वास्तवमा, चीनले चिकित्सा विज्ञान र प्रविधिसहितको सामाजिक–आर्थिक विकासमा ठूलो फड्को मार्दै र जारी राख्दै आएको छ, विकासका परिणामहरू प्रदान गर्न र हाम्रा जनताको समृद्धि हासिल गर्न चीनसँग मिलेर काम गर्ने हाम्रो आशा र आकांक्षा हो।’’

प्रधानमन्त्रीले विशेषगरी स्वास्थ्य क्षेत्रमा नेपालली जनताको स्वास्थ्य सेवामा पहुँच सुनिश्चित गर्न, स्वास्थ्य सुविधाहरूमा सुधार गर्न, स्वास्थ्य पूर्वाधारको विस्तार गर्न, अस्पतालहरूलाई आधुनिक र अत्याधुनिक सुविधाहरू प्रदान गर्न चीनसँग थप सहकार्य गर्ने धारणा राख्नुभयो। उहाँले चिकित्सक र स्वास्थ्यकर्मीहरूलाई ज्ञान, सीप, अस्पताल र स्वास्थ्य सुविधाहरूलाई आवश्यक पर्ने प्रविधिको सहयोग आवश्यकता रहेको औंल्याउनुभयो।

‘‘विशेषगरी स्वास्थ्य क्षेत्रमा नेपाली जनताको राम्रो स्वास्थ्य सेवामा पहुँच सुनिश्चित गर्न, हाम्रा स्वास्थ्य सुविधाहरूमा सुधार गर्न, स्वास्थ्य पूर्वाधारको विस्तार गर्न, हाम्रा अस्पतालहरूलाई आधुनिक र अत्याधुनिक सुविधाहरू प्रदान गर्न चीनसँग थप सहकार्य गर्न चाहन्छ।,’’ प्रधानमन्त्रीले भन्नुभयो, ‘‘हाम्रा चिकित्सक र स्वास्थ्यकर्मीहरूलाई ज्ञान, सीप, अस्पताल र स्वास्थ्य सुविधाहरूलाई आवश्यक पर्ने प्रविधि हस्तान्तरण गर्नुहोस्। यसले पक्कै पनि हाम्रा जनतालाई आधुनिक र अत्याधुनिक स्वास्थ्य सेवा उपलब्ध गराउन मद्दत गर्नेछ।’’

प्रधानमन्त्रीले नेपालको विकास प्रयासमा चीनको निरन्तर सहयोग मित्रवत र असल छिमेकी सम्बन्धको विशेषता भएको उल्लेख गर्नुभयो। उहाँले विकास पूर्वाधार सिर्जना गर्न, सम्पर्क बढाउन, मानव संसाधनको विकास गर्न र अन्य मानिसको जीविकोपार्जनलाई समर्थन गर्न चीन सरकरको धेरै सहयोगको आवश्यकता रहेको बताउनुभयो। प्रधानमन्त्रीले नेपालका स्वास्थ्य पूर्वाधारहरू सिर्जना गर्न,अस्पतालहरूलाई उपकरण र चिकित्सा आपूर्तिमा चीनको समर्थन सह्रानीय रहेको भन्दै प्रशंसा गर्नुभयो।

‘नेपालको विकास प्रयासमा चीनको निरन्तर सहयोग हाम्रो मित्रवत र असल छिमेकीसम्बन्धको विशेषता हो। वास्तवमा यो सहयोग विकास पूर्वाधारहरू सिर्जना गर्न, सम्पर्क बढाउन, हाम्रा मानिसहरूलाई स्वास्थ्य सुविधाहरू प्रदान गर्न, हाम्रो मानव संसाधनको विकास गर्न र अन्य मानिसहरूको जीविकोपार्जनलाई समर्थन गर्न धेरै सहयोगी र आवश्यक भएको छ।,’’ प्रधानमन्त्रीदे भन्नुभयो, ‘‘यो अस्पताल हाम्रा दुई देशले दशकौंदेखि अनुभव गर्दै आएको नेपाल–चीनबीचको गहिरो र घनिष्ट आर्थिक सहयोगको प्रतीकका रूपमा पनि उभिएको मलाई विश्वास छ। वास्तवमा, हाम्रो स्वास्थ्य पूर्वाधारहरू सिर्जना गर्न र विस्तार गर्न, यस विशेष क्षेत्रमा हाम्रो मानव संसाधनको विकास गर्न, साथै हाम्रा अस्पतालहरूलाई उपकरण र चिकित्सा आपूर्तिहरू अझ राम्रोसँग सुसज्जित गर्न चीनको समर्थन सराहनीय छ।’’

प्रधानमन्त्री प्रचण्डले चीनका विभिन्न विश्वविद्यालयमा अध्ययन गरेका चिकित्सहरुले निजामति कर्मचारी अस्पतालमा राम्रो काम गरिरहेको बताउनुभयो। उहाँले कोभिड महामारीको बेला जीवन बचाउने भ्याक्सिन, अत्यावश्यक चिकित्सा उपकरण र अन्य अत्यावश्यक चिकित्सा सामग्रीमा चीनले गरेको उदार सहयोगप्रति कृतज्ञ रहेको भन्दै चीन सरकारलाई धन्यवाद दिनुभयो।