नेपालका संस्कृति, पर्यटन तथा नागरिक उड्डयनमन्त्री सुदन किरातीले भैरहवास्थित गौतम बुद्ध र पोखरा अन्तर्राष्ट्रिय विमानस्थल पब्लिक–प्राइभेट–पार्टनरसीप (पीपीपी) मोडेलमा सञ्चालन गर्ने तयारी भएको जानकारी दिनु भएको छ। विराटनगरमा आइतबार आयोजित पत्रकार सम्मेलनमा मन्त्री किरातीले अत्यन्तै महंगोमा निर्माण भएको गौतम बुद्ध र पोखरा अन्तर्राष्ट्रिय विमानस्थल पीपीपी मोडलमा सञ्चालनका लागि अब बस्ने मन्त्रिपरिषद् बैठकमा प्रस्ताव पेस गर्ने सम्पूर्ण तयारी गरिसकेको बताउनु भएको कान्तिपुर अनलाइनले लेखेको छ।

‘यो दुइटा विमानस्थल अत्यन्तै धेरै खर्चमा बनाइयो तर के कति व्यवसायिक अध्ययन, अनुसन्धान गरिएकोबारे तत्कालीन मन्त्रीज्यूहरुलाई नै थाहा होला,’ उहाँले भन्नुभयो, ‘तर यसलाई सञ्चालनका लागि कूटनीतिक पहल गर्दै व्यावसायिक परियोजना ल्याउन लागेका छौं जुन पीपीपी मोडलमा जान छिट्टै नै नागरिक उड्डयन प्राधिकरणबाट निर्णय गरेर मन्त्रालयमार्फत् मन्त्रिपरिषद्मा लग्ने तयारी छ।’

उक्त विमानस्थलहरुमा चीनका विभिन्न सहरबाट चार्टर फ्लाइट सुरु भएको, भुटानबाट पनि प्रयास भइरहेको र क्वालालम्पुरबाट भैरहवा, भैरहवाबाट काठमाडौं, काठमाडौंबाट हङकङ, क्वालाल्मपुरबाट काठामाडौं र काठमाडौंबाट दिल्ली र कोलम्बो उडानका लागि तयारी भइसकेको उहाँले जानकारी दिनुभयो।

पोखराको छिनेडाँडा क्षेत्रको २ सय हेक्टर क्षेत्रफलमा करिब २२ अर्ब रुपैयाँ चिनियाँ ऋण लगानीमा अन्तर्राष्ट्रिय विमानस्थल निर्माण सम्पन्न भएपछि २०७९ पुस १७ गते प्रधानमन्त्री पुष्पकमल दाहालले उद्घाटन गर्नु भएको थियो। ११ जहाज पार्किङ, आन्तरिकतर्फ दैनिक ४८ र अन्तर्राष्ट्रियतर्फ ६ वटा उडान तथा अवतरण गर्ने क्षमता रहेको विमानस्थलको २५ सय मिटर रनवे रहेको छ। यसमा १५० देखि १८० सिट भएको एयरबस ३२० र बोइङ ७५७ वा सो सरहको जहाज उडान गर्ने क्षमता छ।

यस्तै, आठ सय बिघामा करिब साढे ३२ अर्बको लागतमा निर्माण भएको गौतम बुद्ध अन्तर्राष्ट्रिय विमानस्थल २०७९ जेठ २ गते तत्कालीन प्रधानमन्त्री शेरबहादुर देउवाले उद्घाटन गरेका थिए। ३ हजार मिटर लम्बाइको रनवे रहेको यस विमानस्थलमा बोइङ ७७७ र एयरबस ३३० र त्यही क्षमताका वाइडबडी विमान अवतरण र उडान भर्न सक्ने क्षमता रहेको छ।

मन्त्री किरातीले एसिया महादेशमा न्यारोबडी उडानका लागि कनेक्सन फ्लाइटको तयारीमा रहेको बताउनु भएको छ। ‘दुबईबाट उडेका व्यक्तिलाई काठमाडौंमा अवतरण गर्ने बित्तिकै ट्रान्जिट भएर जान चाहेको विराटनगर, पोखरा, भैरहवा वा नेपालगञ्ज पुगेपछि त्यहाँबाट पनि ट्रान्जिट भएर आ–आफ्ना जिल्ला वा घर नजिकको विमानस्थलसम्म जाने कनेक्शन फ्लाइटको व्यवस्था गर्दै छौं,’ उहाँले भन्नुभयो, ‘कनेक्शन फ्लाइटले विदेशबाट आउने बित्तिकै लगेज बोकेर होटलतर्फ दौड्नैपर्ने बाध्यात्मक अवस्थाको अन्त्य गर्नुका साथै यात्रुलाई एकै दिनमा बिना रोकावट गन्तव्यसम्म पुर्‍याउने प्रयत्नमा लागेका छौं।’

अन्तर प्रदेश उडानका लागि सरकारी जहाज नभएकाले बजारमा हस्तक्षेप गर्न नसकिएको मन्त्री किरातीले बताउनु भएको छ। ‘निजी विमान कम्पनीहरुलाई घोर्के ठ्याक लगाएर लग्न मिल्दैन, संविधानमा नै तीन खम्बे अर्थनीति छ,’ उहाँले भन्नुभयो, ‘अन्तर प्रदेशीय उडानको संस्कृति बसाउन पनि उडान आवश्यक छ। बन्द अवस्थामा रहेको दुर्गम क्षेत्रका २२ वटा विमानस्थलहरु र अन्तर प्रदेश उडानका लागि हस्तक्षेपकारी भूमिकामा आउन एउटा वर्षौंदेखि ग्राउण्डेड रहेकाको मर्मत भएर एक/डेढमा चल्ने र थप तीन वटा जहाज किन्ने तयारी अन्तिम चरणमा पुगेको छ।’ बन्द रहेको विमानस्थलका साथै अन्तर प्रदेशीय उडान संस्कृतिको विकासका लागि सरकारले घाटा सहेर भए पनि सामाजिक उत्तरदायित्वका लागि पनि विमानस्थलहरुलाई व्यवसायिक रुपमा सञ्चालनको तयारीमा रहेको मन्त्री किरातीले बताउनुभयो।

हिजो राजनीतिक दबाबमा एकै जिल्लामा तीन वटासम्म विमानस्थल निर्माण भएको तर अब आवश्यकताको आधारमा मात्रै निर्माण हुने र निर्माण भएका विमानस्थलहरुलाई घाम ताप्न र गौचरणमा परिणत हुन नदिइ सञ्चालन हुनुपर्ने नीति रहेको उनले सुनाउनुभयो।

‘विराटनगरमा क्षेत्रीय विमानस्थल हुँदाहुँदै धरान, उदयपुरमा विमानस्थल निर्माण गरेर हुन्छ ? के बस स्टेण्ड बनाए जस्तो हो विमानस्थल ?,’ उहाँले भन्नुभयो, ‘विराटनगर विमानस्थलबाट तत्काल क्षेत्रीय अन्तर्राष्ट्रिय उडानका लागि तयारी भइरहेको छ।’ राष्ट्रिय ध्वजाबाहक जहाज खरिदपछि विराटनगरबाट लुक्लालगायतका पहाडी जिल्लास्थित विमानस्थलहरुमा उडान सुरु गर्ने तयारी रहेको उहाँले सुनाउनुभयो।