सेप्टेम्बर २२ तारिख दिउँसो, चिनियाँ राष्ट्राध्यक्ष सी चिनफिङले हाङचौमा १९ औँ एसियाली खेलकुदको उद्घाटन समारोहमा भाग लिन आउनुभएका कुवेतका युवराज मिशल अहमद अल जबाएर अल-सबाहसँग भेटवार्ता गर्नुभएको छ।

भेटवार्तामा राष्ट्राध्यक्ष सीले भन्नुभयोः हाङचौ एसियाली खेलकुदको उद्घाटन समारोहमा सहभागी हुन चीन आउनुभएकामा तपाईंलाई हार्दिक स्वागत छ र कुवेती खेलाडीको राम्रो उपलब्धि पाउने कामना गर्छु। चीन र कुवेतबीचको परम्परागत मित्रता गहिरो छ। कुवेत नै जनगणतन्त्र चीनसँग दौत्य सम्बन्ध स्थापना गरेको पहिलो खाडी अरबेली देश हो र "बेल्ट एण्ड रोड" अवधारणामा चीनसँग सहयोग दस्तावेजमा हस्ताक्षर गरेको पहिलो मध्यपूर्वी देश पनि हो। कूटनीतिक सम्बन्ध स्थापना भएको ५२ वर्षमा, विशेषगरी दुई देशबीच रणनीतिक साझेदारी सम्बन्ध स्थापना भएको ५ वर्षमा चीन-कुवेत सम्बन्धमा ठूलो प्रगति प्राप्त भएको छ र विभिन्न क्षेत्रमा भएका सहयोगको समृद्ध परिणाम हासिल गरिएको छ। चीन-कुवेत सम्बन्धको विकासमा निकै ठूलो महत्व दिँदै चीन-कुवेत सम्बन्धलाई नयाँ उचाइमा पुर्याउन महामहिम युवराजसँग मिलेर काम गर्ने इच्छा लिएको छु।