अमेरिकाको क्यालिफोर्नियाका गभर्नर गेभिन न्यूसोम चीन भ्रमणमा हुनुहुन्छ। चिनियाँ राष्ट्राध्यक्ष सी चिनफिङले २५ तारिखमा उहाँसँग भेटवार्ता गर्नुभयो। बेलायती "डेली मेल" ले न्यूसोमलाई चिनियाँ नेताहरूबाट न्यानो स्वागत प्राप्त गरेको लेखेको छ। केही विदेशी सञ्चारमाध्यमहरूले यसबाट चीनले चीन-अमेरिका स्थानीय सहयोगलाई प्रवर्द्धन गर्न ठूलो महत्व दिएको र अपेक्षा गरेको औंल्याएका छन्।
चीन-अमेरिका सम्बन्धको जग जनतामा छ, जनतामा आशा छ र भविष्य युवाहरूमा निहित छ भनी राष्ट्राध्यक्ष सीले धेरै पटक उल्लेख गर्नुभएको छ। यस पटक न्युसोमसँग भेट्दा अर्को बिन्दु थप्नुभयो- जीवन शक्ति स्थानीय क्षेत्रमा निहित छ।
न्यूसोमको चीन भ्रमणको महत्वपूर्ण कार्य जलवायु परिवर्तनसँग जुध्न सहयोग खोज्नु हो। यस वर्षको सेप्टेम्बरमा उहाँले सीएनएनसँगको अन्तर्वार्तामा जलवायु परिवर्तनसँग सम्बन्धित चीनसँगको सम्बन्धलाई सबैभन्दा महत्वपूर्ण र आधारभूत सम्बन्धका रूपमा हेर्नुपर्ने बताउनुभएको थियो। क्यालिफोर्निया अमेरिकामा सबैभन्दा महत्वपूर्ण प्राविधिक नवाचार आधारहरू मध्ये एक हो। अहिलेसम्म मिडियाले जारी गरेको विवरणबाट वैज्ञानिक र प्राविधिक सहयोगमा न्यूसोमको चासो छ। त्यति मात्र होइन, न्यूसोमसँग चीन-अमेरिका सम्बन्धको तर्कसंगत र व्यावहारिक समझ छ। चाइना मिडिया ग्रुपसँगको अन्तर्वार्तामा उहाँले चीन र अमेरिकाका लागि "डिकपलिंग" राम्रो विकल्प होइन भन्नुभयो। पत्रकार सम्मेलनमा उहाँले अमेरिका–चीन सहकार्य शून्य परिणतिको खेल नभएको पनि बताउनुभयो। “चीन जति सफल हुन्छ, हामी सबै उति सफल हुनेछौं”। यी कथनहरूले अमेरिकी स्थानीय सरकारमा चीन–अमेरिका सम्बन्धको वस्तुगत बुझाइलाई प्रतिनिधित्व गर्दछ, अमेरिकी समाजको चीन-अमेरिका सम्बन्धको सहजताका लागि अपेक्षाहरूको प्रतिनिधित्व गर्दछ। त्यस्ता स्थानीय अन्तरक्रियाहरूले चीन-अमेरिका सम्बन्धलाई सुधार र विकास गर्न पनि सकारात्मक ऊर्जा प्रदान गरेको छ।
चीन र अमेरिकाको कुल आर्थिक उत्पादन विश्वको एक तिहाइभन्दा बढी छ, कुल जनसंख्याले विश्वको झण्डै एक चौथाइ ओगटेको छ र द्विपक्षीय व्यापारको मात्रा विश्वको करिब एक-पाँच भाग ओगटेको छ।