कास्कीको माछापुच्छ्रे गाउँपालिकाभित्रका पदमार्गमा जाने पर्यटकले शुल्क तिर्नुपर्ने भएको छ। माछापुच्छ्रे गाउँपालिकाले पदमार्गमा पूर्वाधार निर्माण र व्यवस्थापनका लागि पर्यटकसँग शुल्क लिने निर्णय गरेको हो। गाउँसभाको निर्णयअनुसार आन्तरिक र बाह्य पर्यटकका लागि छुट्टाछुट्टै शुल्क लिइने प्रमुख प्रशासकीय अधिकृत गोपीकृष्ण अर्यालले जानकारी दिनुभयो।

 गाउँपालिकाले आज सूचना प्रकाशित गरी यस विषयमा जानकारी गराएको हो। सूचना अनुसार पालिकाभित्रको पदमार्गमा जाने विदेशी पर्यटकले  पाँच सय र नेपाली पर्यटकले एक सय रुपैयाँ तिर्नुपर्ने छ। गाउँपालिकाले पर्यटकीय पदमार्गमा सामान्य पूर्वाधार निर्माण, सूचना केन्द्र स्थापना, सोलार बत्ती जडान, फोहरमैला व्यवस्थापन लगायतका सुविधा निर्माण तथा व्यवस्थापन गर्न पर्यटन सेवा शुल्क लिने गरिएको उहाँले बताउनुभयो।

 स्थानीय तहको अधिकार सूचीअनुसार पालिकाको आर्थिक ऐन २०८० को अनुसूची ६ दफा ७ अनुसार शुल्क तोकिएको माछापुच्छे  गाउँपालिका–८ का वडाध्यक्ष रामबहादुर गुरुङले जानकारी दिनुभयो।

 यसरी शुल्क तोक्दा ट्रेकिङ गर्ने पर्यटकको अभिलेख रहने भएकाले आगामी योजना बनाउन सहज हुने उहाँको भनाइ थियो। “हाम्रोमा अहिले चारवटा ट्रेकिङ रुट छन्। त्यहाँ वर्षमा कतिजना जान्छन् कसैलाई थाहा छैन। यसले यहाँको अभिलेखीकरणमा सहयोग मिल्छ,’ वडाध्यक्ष गुरुङले भन्नुभयो, ’हामीले नियमसङ्गत शुल्क उठाउने निर्णय गरेका हौँ। यसबाट उठेको रकम पदमार्गमा खर्च हुन्छ। हामीले यहाँ सूचना केन्द्र बनाउने तयारी गरेका छौँ। यसले दुर्घटना हुँदा उद्धारमा पनि सघाउँछ।’