नेपालको बागमती प्रदेश प्रमुख यादवचन्द्र शर्माले बागमती प्रदेश र चीनको युन्नान प्रदेशबीच भगिनी सम्बन्ध स्थापित गराई आपसी सहयोगको वातावरण निर्माणका लागि प्रस्ताव गर्नु भएको छ। यही मंसिर १६ देखि २१ गतेसम्म भएको चीन भ्रमणका क्रममा प्रदेश प्रमुख शर्माले चीनको युन्नान प्रदेशका भाइस गभर्नरलाई बागमती प्रदेश र युन्नान प्रदेशबीच मित्रवत सम्बन्ध स्थापनाका लागि प्रस्ताव गर्नु भएको नेपाल खबर अनलाइनले लेखेको छ।
यस खालको सम्बन्ध स्थापित भएमा दुई देशका प्रदेशबीच आपसमा कृषि, पर्यटन लगायतका क्षेत्रमा सहयोगको वातावरण सृजना हुने अपेक्षा गरिएको छ। यस्तै, भ्रमणका क्रममा चीनको स्थानीय तह र नेपालको स्थानीय तहबीच मित्रवत् सम्बन्ध स्थापित गरी आपसी सहकार्यमा अगाडी बढ्ने विषयमा पनि प्रदेश प्रमुख शर्माले आफ्नो भनाइ राख्नु भएको प्रदेश प्रमुख शर्माका प्रेस संयोजक शिव चौलागाईंले जानकारी दिनुभयो।
प्रदेश प्रमुख शर्माको नेतृत्वको पाँच सदस्यीय भ्रमण टोलीले चीनको युन्नान प्रदेशको कृषि पर्यटनका विभिन्न क्षेत्रको अवलोकन गरेको छ।
भ्रमण टोलीमा प्रमुख शर्मा पत्नी उर्मिला चौलागाईँ, हेटौंडा उपमहानगरपालिकाका प्रमुख मीना कुमारी लामा, प्रमुख प्रशासकीय अधिकृत शिवराज चौलागाईँ र प्रदेश प्रमुखको कार्यालय बागमती प्रदेशका उप सचिव गोविन्द प्रसाद पौडेल सहभागी हुनुहुन्थ्यो।
