नेपालभरका आयोजना निर्माण व्यवसायीका कारण अलपत्र बनिरहेको अवस्थामा सूर्यविनायक धुलिखेल सडक खण्डमा भने व्यवसायीका कारण अहिलेसम्म काम रोकिएको छैन। पछिल्लो समय पर्याप्त बजेट नभएर मात्र सडक विस्तारको गति कम हुन पुगेको छ। सूर्यविनायक–धुलिखेल–सिन्धुली–बर्दिबास सडक आयोजनाका अनुसार सूर्यविनायक–धुलिखेल खण्डको १५.८ किलोमिटर विस्तार गर्न २०७९ मंसिर अन्तिमदेखि सुरु भएको हो। आयोजनाले यो दुरीलाई दुई खण्डमा विभाजन गरेर सडक विस्तार गरिरहेको छ। त्यसमध्ये काम सुरु भएको १५ महिनामा एउटा खण्डको भौतिक प्रगति २२ र अर्कोको १५ प्रतिशत पुगेको कारोबार अनलाइनले लेखेको छ। छोटो समयमै भौतिक प्रगति राम्रो हुनुले सरकारले बजेट दिए लक्षित समयमा आयोजना पूरा हुने देखिन्छ। आयोजनाका अधिकारीहरु पनि पर्याप्त बजेट दिए समयमा सडक विस्तारको कार्य सकिनेमा ढुक्क छन्।

आयोजनाका सिनियर डिभिजन इन्जिनियर नारायणप्रसाद लामिछानेले सरकारले पयाप्त बजेट विनियोजन गरे यो सडक विस्तार समयमा सक्ने लक्ष्य रहेको बताउनुभयो। उहाँका अनुसार यो सडकमा नालीका काम दुवै खण्डमा पूरा भएको छ, तर बजेट अभावले भुक्तानीमा समस्या आएको छ। उहाँले भन्नुभयो, ‘आयोजाको काम अगाडि बढिरहेको छ। तर, बजेट अभाव छ। यसले गर्दा कामले गति लिन सकेको छैन। पर्याप्त बजेटको व्यवस्था भए समयमै काम सकिनछ।’

चालु आवमा यो आयोजनाका लागि ५४ करोड रुपैयाँमात्र बजेट विनियोजन गरिएको छ। आगामी वर्ष पनि यो आयोजनाले पर्याप्त बजेट पाउने सम्भावना कम छ। आगामी वर्षका लागि बन्दै गरेको बजेटमा भौतिक पूर्वाधार मन्त्रालयलाई नै कम बजेट दिइएको छ। सम्झौताअनुसार निर्माणको जिम्मा पाउने कम्पनीले ३ वर्षभित्रमा निर्माण पूरा गर्नुपर्ने शर्त राखिएको छ। जापानी सहयोग नियोग (जाइका) यो सडक खण्ड विस्तारबाट पछि हटेसँगै सडक विभागले आन्तरिक स्रोतबाट निर्माण थालेको हो। आयोजनाका अनुसार पहिलो खण्ड भक्तपुरको सूर्यविनायकदेखि साँगासम्म हो। यो खण्डमा ७.५ किलोमिटर सडक पर्छ। यो खण्ड ६ लेनको बन्नेछ। मुख्य सडक ४ र सर्भिस लेन २ लेन निर्माण भइरहेको छ। यो खण्ड निर्माणका लागि आशिष-कुमार श्रेष्ठ-बन्धन भगवती जेभीसँग सम्झौता भएको थियो। यसको लागत ३ अर्ब ८९ करोड ९३ लाख पर्नेछ।

यो खण्डको हालसम्म भौतिक प्रगति १५ प्रतिशत पुगेको छ। यो खण्डमा पर्ने रिटेनिङ वालको ५८ प्रतिशत काम पूरा भएको छ। यस्तै, १० वटा कल्भर्ट निर्माणको चरणमा छन्। यो खण्डमा बन्ने पुलको भने डिजाइन बनिरहेको आयोजनाले जनाएको छ। यसमा २ वटा पुल निर्माण गर्नुपर्ने छ। यो खण्डमा पर्ने जगातीमा १५ मिटरको र महादेव खोलामा १५ मिटरकै पुल बनाइने छ।

दोस्रो खण्ड साँगादेखि धुलिखेलसम्मको साढे ८.३ किलोमिटर सडक पर्छ। यो खण्डका लागि २०७९ मंसिर २७ मा सम्झौता भएको थियो। यो सडक निर्माणको ठेक्का लामा कन्स्ट्रक्सन कम्पनीले पाएको हो। यो ठेक्का २०८२ मंसिर २६ मा पूरा गर्ने लक्ष्य राखिएको छ। यसका लागि ४ अर्ब ५ करोड लागत पर्नेछ। अहिलेसम्म यो खण्डको भौतिक प्रगति २२ प्रतिशत पुगेको छ।

यो खण्डमा पनि मुख्य ४ र सर्भिस २ गरी ६ लेनको सडक निर्माण हुँदैछ। रिटेनिङ र ब्रेस्ट वाल, स्ट्रक्चर कल्भर्ट २१ वटा निर्माण गर्नुपर्नेमा ४ वटा पूरा भएका छन्, १७ वटा निर्माणको चरणमा छन्। यो खण्डको सडकको नाली पूरै तयार भएको छ भने ब्रेस्ट वालको ६० प्रतिशत काम पूरा भएको जनाइएको छ।

यो खण्डअन्तर्गत बनेपाको चण्डेश्वरी खोलामा १२ मिटर र पुन्नेमातामा २० मिटरको पुल बन्नेछ। ६ लेनमा बन्ने दुवै खण्डका सडकमा ३ मिटरको मेडियन निर्माण हुनेछ। साथै दुवैतर्फ सर्भिस लेनसहित दुई मिटरको फुटपाथ निर्माण गर्नु पर्नेछ। यो सडक विस्तारपछि बिपी राजमार्ग भएर सञ्चालन हुने सवारीको आगमनमा सहज हुनेछ।

बिपी मार्ग राजधानीलाई पूर्वी तराई जोड्ने वैकल्पिक राजमार्ग हो। १ सय ६० किलोमिटर लामो यो राजमार्ग जापानले करिब २० वर्ष लगाएर (सन् १९९६–२०१५) निर्माण गरेको थियो। संघीय राजधानीबाट बागमती हुँदै मधेश र कोशी प्रदेशसम्म जान यो सडकको दूरी कम छ।