बंगलादेश र भुटानका वायुसेवा कम्पनीले पोखरामा सिधा उडानको प्रस्ताव गरेका छन्।

अन्तर्राष्ट्रिय उडान हुन नसकेको नवनिर्मित पोखरा अन्तर्राष्ट्रिय विमानस्थलमा २ एयरलाइन्स एयर अस्त्र र ड्रुक एयरले सरकारसँग प्रस्ताव गरेका हुन्। संस्कृति, पर्यटन तथा नागरिक उड्डयन मन्त्रालयकी सहसचिव इन्दु घिमिरेले अनौपचारिक प्रस्ताव आएको बताउनुभयो।

 ‘नेपालमा भएका जीएसए र कम्पनीका प्रतिनिधिले अनौपचारिक प्रस्ताव पठाएका छन्’, हवाइ उडान महाशाखाकी प्रमुख समेत रहेकी घिमिरेले भन्नुभयो, ‘पोखरा विमानस्थलमा उडान गर्न उहाँहरु इच्छुक हुनुहुन्छ। उडानका लागि के के सुविधा दिने भन्ने निश्चित भइसकेको छैन।’

 पोखरा अन्तर्राष्ट्रिय विमानस्थल सञ्चालनमा आएको डेढ वर्ष पूरा हुँदा एउटा पनि नियमित उडान हुनसकेको छैन। चिनियाँ सहुलियतपूर्ण ऋण सहयोगमा बनेको विमानस्थल सञ्चालन गर्न नसकेकोमा सरकारको आलोचना भइरहेको छ।

 बंगलादेश र भुटानबाट पोखरा नियमित उडान भएमा अन्य देशका एयरलाइन्सहरूबाट पनि प्रस्ताव आउनसक्ने देखिएको छ। यसरी पोखरा अन्तर्राष्ट्रिय विमानस्थल सञ्चालमा आएमा सरकारले भारतसँग पनि प्रवेश मार्ग र उडान अनुमतिका लागि थप छलफल गर्न सक्ने उड्डयन क्षेत्रका अधिकारीहरू बताउँछन्। पोखरामा ठूला जहाज उडानमा प्राविधिक समस्या हुनसक्ने भए पनि एयरबस ३१९ जहाज नियमित उडानमा समस्या छैन। नेपालखबरका अनुसार भुटान, चीनबाट चार्टर्ड उडान भइसकेका छन्।

नियमित उडानको लागि २ प्रस्ताव आए पनि सरकारले निर्णय गरिसकेको छैन।

‘पोखरा उडानको लागि बंगलादेश र भुटानको एयरलाइन्सले चासो राखेका छन्’, उड्डयन प्राधिकरणका सूचना अधिकारी ज्ञानेन्द्र भुलले भन्नुभयो, ‘उनीहरुको प्रस्ताव संस्कृति, पर्यटन तथा नागरिक उड्डयन मन्त्रालय र अर्थ मन्त्रालयमा विचाराधीन छ।’

 नेपालमा भुटान र बंगलादेशबाट नियमित उडान भइरहेका छन्। विमान बंगलादेश र नेपालकै हिमालय एयरलाइन्सले बंगलादेशमा नियमित उडान गर्दै आएका छन्। त्रिभुवन विमानस्थलबाट उक्त उडान हुँदै आएको छ। अहिले बंगलादेशको निजी वायुसेवा कम्पनी एयर अस्त्रले नेपालको पोखरामा उडानको प्रस्ताव गरेको हो। कम्पनीले बंगलादेशमा एटीआर जहाजमार्फत उडान गर्दै आएको छ।‘एयर अस्त्रले ढाका–पोखरा–ढाका हप्ताको ४ वटा उडानको प्रस्ताव गरेको छ’, उडान अनुमति शाखाका प्रमुख भुलले भन्नुभयो, ‘बंगलादेशबाट उडान अनुमति पाएको पत्र हामीलाई पठाएको छ।’

 उक्त पत्र संस्कृति, पर्यटन तथा नागरिक उड्डयन मन्त्रालयमा छ भने कर छुटसहित सहुलियतको प्रस्ताव अर्थ मन्त्रालयमा पुगेको छ। ढाका–पोखरा–ढाका उडानको लागि नेपाल सरकारले छुट दिए नियमित उडान गर्ने कम्पनीको प्रतिबद्धता छ।

 यसैबीच हाल भुटानको २ वटा एयरलाइन्सले काठमाडौंमा उडान गरिरहेका छन्। ड्रुक एयरले एटीआर र एयरबस ३१९ बाट काठमाडौंमा उडान गर्दै आएको छ। त्यसबाहेक भुटान एयरले एयरबस ३१९ बाटै उडान गरिरहेको छ।  भुटान सिभिल एभिएसन अथोरिटीले नेपाल नागरिक उड्डयन प्राधिकरणसँग पोखरा र भैरहवामा उडानको प्रस्ताव गरेको थियो। पोखरा उडानको लागि भुटानको राष्ट्रिय ध्वजावाहक विमान कम्पनी ड्रुकले प्रस्ताव गरेको छ।गत वर्ष भदौ २३ गते ड्रुक एयरको जहाजले पोखरामा चार्टर्ड उडान गरेको थियो। उक्त कम्पनीले पारो अन्तर्राष्ट्रिय विमानस्थलबाट अन्तर्राष्ट्रिय र आन्तरिक उडान गर्दै आएको छ।