चिनियाँ जनराजनीतिक परामर्शदातृ सम्मेलन (सीपीपीसीसी) का उपाध्यक्ष बाटरले आइतबार प्रधानमन्त्री पुष्पकमल दाहालसँग शिष्टाचार भेटवार्ता गर्नुभएको छ। चारदिने भ्रमणमा शुक्रबार नेपाल आएका बाटरले प्रधानमन्त्रीका साथै उपराष्ट्रपति रामसहायप्रसाद यादव र उपप्रधान तथा परराष्ट्रमन्त्री नारायणकाजी श्रेष्ठलाई भेटिसक्नुभयो।
सरकारी पक्षले ती भेटवार्ताहरूमा द्विपक्षीय सम्बन्ध, आपसी सहयोग र दुई मुलुकबीच भएका विभिन्न सम्झौता र सहमति कार्यान्वयनका विषयमा छलफल भएको उल्लेख गरेको छ । तर विज्ञहरू चिनियाँ पक्षबाट राजनीतिक तहमा भएको भ्रमणलाई सुरक्षा र राजनीतिक पक्षमा केन्द्रित भएको बताउँछन् । सीपीपीसीसी चिनियाँ कम्युनिस्ट पार्टी र सरकारको उच्च राजनीतिक सल्लाहकार संयन्त्र हो ।
प्रधानमन्त्रीका परराष्ट्र मामिला सल्लाहकार रूपक सापकोटाका अनुसार प्रधानमन्त्री दाहाल र उपाध्यक्ष बाटरबीच द्विपक्षीय सम्बन्ध, आपसी सहयोगबारे छलफल भएको थियो । दाहालले नेपाल–चीन सीमा क्षेत्रका परम्परागत १४ वटा नाका सञ्चालनमा ल्याउने तथा महत्त्वपूर्ण सम्झौता क्रमशः कार्यान्वयन हुँदै गएकामा चीन सरकारलाई धन्यवाद दिनुभयो। उहाँले दुई देशबीच भएको अन्य सम्झौता पनि क्रमशः कार्यान्वयन हुँदै जाने विश्वास व्यक्त गर्नुभयो।
‘प्रधानमन्त्रीले अहिले चीन, भारतसहित मैत्रीपूर्ण सम्बन्ध रहेका मुलुकसँग नेपालको आर्थिक विकासका लागि तथा सन् २०२६ मा अतिकम विकसित मुलुकबाट स्तरोन्नतिका लागि बहुपक्षीय र द्विपक्षीय सहयोग लिइरहनुभएको छ । भारत भ्रमणमा पनि राजनीतिक भेटवार्ता र संवादहरूका क्रममा मूलतः आर्थिक र अर्थ राजनीतिमा आधारित हाम्रो राष्ट्रिय दृष्टिकोण प्रधानमन्त्रीले प्रस्तुत गर्नुभएको थियो,’ सापकोटाले भन्नुभयो।
कान्तिपुर अनलाइनका अनुसार उपराष्ट्रपति यादवले शुक्रबार उपाध्यक्ष बाटरसँगको भेटमा पोखरा अन्तर्राष्ट्रिय विमानस्थलको उद्घाटनले नेपालको पर्यटन बजारमा महत्त्वपूर्ण योगदान पुर्याउनेमा आफूहरू पूर्ण विश्वस्त रहेको उल्लेख गर्नुभयो। चीनको ‘सिचुआन विमान’ ले छेन्दु र पोखराबीच चार्टर्ड उडान गरेको तथा छिन्दु र काठमाडौंबीच उडान सुचारु भएकामा खुसी व्यक्त गर्दै उनले आगामी दिनमा पोखरा र चीनका विभिन्न सहरबीच व्यावसायिक उडान सुरु हुनेमा विश्वाससमेत व्यक्त गर्नुभयो।
यादवले चीन सरकारले २०२४ को मे १ देखि लागू हुने गरी चीन भ्रमण गर्ने नेपालीका लागि भिसा शुल्क मिनाहा गरेको जानकारी पाएर खुसी लागेको उल्लेख गर्नुभयो। जवाफमा उपाध्यक्ष बाटरले नेपालको संघीय लोकतान्त्रिक गणतन्त्रात्मक शासन व्यवस्थालाई सबल र सुदृढ बनाउने पक्षमा चीन रहेको बताउनुभएको थियो। बाटरले उपप्रधान तथा परराष्ट्रमन्त्री नारायणकाजी श्रेष्ठसँग शनिबार भेटवार्ता गरी दुई देशबीचको सम्बन्धलाई थप बढावा दिने, आर्थिक र विकास क्षेत्रमा सहकार्य गर्ने तथा जनस्तर सम्बन्धबारे छलफल भएको मन्त्रालयले जनाएको छ ।
पूर्वराजदूत दिनेश भट्टराई चीनका राजनीतिक दलका नेताबाट नेपालमा भइरहेका भ्रमणले अर्थ राख्ने भन्नुहुन्छ। ‘चीनमा पार्टी (चिनियाँ कम्युनिस्ट पार्टी) बलियो हुन्छ । त्यहाँ सबै पार्टीले नै निर्णय लिन्छ । नेपालमा पार्टीका पदाधिकारी आएर भेटवार्ता गर्नुलाई नजिकबाट हेर्न आवश्यक हुन्छ,’ उहाँले भन्नुभयो, ‘चीनबाट अहिले संलग्नता बढ्दो छ । अहिलेको भ्रमण त्यसैको निरन्तरता नै हो ।’
अर्का पूर्वराजदूत विजयकान्त कर्णले नेपालका कम्युनिस्ट पार्टी र चिनियाँ कम्युनिस्ट पार्टीबीचमा पछिल्लो समय बढी सहकार्य भइरहेको टिप्पणी गर्नुभयो। उहाँले दुई मुलुकको सम्बन्धमा भन्दा पनि दलगत सम्बन्धलाई बढी चासो दिइएको बताउनुभयो । ‘नेपालले चीनबाट पूर्वाधार निर्माण होस् । नेपालमा आर्थिक समृद्धि होस् भन्ने चाहेको छ ।’
