नेकपा (एमाले) का सचिव तथा प्रतिनिधि सभा सदस्य योगेश भट्टराईले जनताको बहुदलीय जनवाद (जबज) को मार्गदर्शनमा नेपाल शान्तिपूर्ण बाटो मार्फत समाजवादतर्फ अघि बढिरहेको बताउनुभएको छ। सचिव भट्टराईले आफूहरुले शान्तिपूर्ण प्रक्रिया मार्फत नेपाली जनताको बलियो समर्थन सहित समाजवाद हासिल गर्न चाहेको तर नेपाल त्यसै तर्फ अघि बढेको बताउनुभएको हो। ‘सोसियल साइन्स एकेडेमी’ अर्थात् चिनियाँ सामाजिक विज्ञान प्रतिष्ठानको आयोजनामा बेइजिङमा आयोजित १४ औं विश्व समाजवाद फोरमलाई सम्बोधन गर्दै एमाले सचिव भट्टराईले जबज नेपाली भूमिमा माक्र्सवादको सृजनात्मक प्रयोग रहेको र त्यसकैको आलोकमा समाजवाद हासिल गर्न चाहेको बताउनुभयो।

‘नेपालमा हामी समाजवादी उन्मुख संविधान स्वीकार गर्दै सामाजिक–आर्थिक असमानतालाई सम्बोधन गर्न अघि बढिरहेका छौं, जसमा प्रमुख राजनीतिक दलहरूको सामूहिक विवेक समावेश छ। हाम्रो पार्टी नेकपा (एमाले) ले स्वार्गिय कमरेड मदन भण्डारीको नेतृत्वमा ‘जनताको बहुदलीय जनवाद (जबज) को सिद्धान्त विकास गरेको छ,’ सचिव भट्टराईले सम्बोधनमा भन्नुभयो, ‘हामी जबजको मार्गदर्शनमा हामी नेपाली तरिकामा शान्तिपूर्ण माध्यमबाट समाजवादतर्फ अघि बढिरहेका छौं। जबज नेपाली अभ्यास र नेपाली भूमिमा माक्र्सवादको रचनात्मक प्रयोगमा आधारित छ। हामी शान्तिपूर्ण प्रक्रियामा जनताको बलियो समर्थनसहित समाजवाद हासिल गर्न चाहन्छौं। यो नयाँ युगको नेपाली मोडेल र विशेषताहरूको क्रान्ति हो।’

बेइजिङमा जारी १४ औं विश्व समाजवाद फोरममा विश्वका ३० देशका कम्युनिष्ट नेता, माक्र्सवादी बुद्धिजीवि, विश्वविद्यालयका प्राध्यापक, अनुसन्धानकर्ता गरी ५० विदेशी अथिथि र चिनियाँ नेता, प्राध्यापक, बुद्धिजीवि सहित १ सय ५० बढी सहभागी छन्।

फोरमलाई सम्बोधन गर्दै नेपालको मुख्य ध्येय नेपालको सार्वभौमसत्ता, भौगोलिक अखण्डता, स्वतन्त्रता रक्षा गर्दै राष्ट्रिय गरिमालाई उन्नत गर्नु र आर्थिक समृद्धि तथा समृद्धि प्रवद्र्धन गर्नु रहेको बताउनुभयो। यी उद्देश्यहरू हासिल गर्न, हामी एकअर्काको समानताप्रतिको सम्मान, पारस्परिक फाइदाका लागि सहयोग, गुटनिरपेक्षता, संयुक्त राष्ट्रसंघको चार्टर र विश्व शान्तिको मुल्यहरु नेपालले दृढतापूर्वक पालना गर्ने बताउनुभयो।

उहाँले भन्नुभयो, ‘प्रधानमन्त्री सम्माननीय केपी शर्मा ओलीको नेतृत्वमा ‘समृद्ध नेपाल, सुखी नेपाली’ भन्ने राष्ट्रिय आकांक्षालाई पूरा गर्ने हाम्रो महान् चाहनाका साथ हामी सबैका मित्रहरूको समर्थन, सहयोग र ऐक्यबद्धताको अपेक्षा राख्छौं।’

नागरिकन्यूज डटकमका अनुसार सचिव भट्टराईले मानव सभ्यता र पृथ्वीलाई जोगाउन समाजवादी देशहरूबीच सहयोग अपरिहार्य रहेको बताउनुभयो। सचिव भट्टराईले अतीतमा समाजवादको आलोचना हुँदा मानव पक्षलाई ध्यान दिएको थिएन भन्ने आरोप बारेमा सम्झाउदै समाजवादको कुनै विकल्प नरहेको बताउनुभयो। जलवायु परिवर्तनको प्रभाव विश्वको प्रमुख चुनौती रहेको भन्दै जलवायु परिवर्तनविरुद्धको विश्वव्यापी लडाइँ न्यायसंगत हुनुपर्ने उहाँले ठहर गर्नुभयो।

एमाले सचिव भट्टराईले  चिनियाँ समाजवादको मोडेल सफल रहेको भन्दै चीनबाट अझ धेरै कुरा सिक्न चाहेको बताउनुभयो। उहाँले भन्नुभयो, ‘चिनियाँ समाजवादको मोडेल सफल छ। हामी चीनबाट अझ धेरै कुरा सिक्न चाहन्छौं। म तपाईं चिनियाँ कमरेडहरूलाई चिनियाँ कम्युनिस्ट पार्टी र राष्ट्रपति सी चिनफिङको नेतृत्वमा हासिल गरेको ठूला सफलताहरूको लागि धन्यवाद दिन चाहन्छु।’उहाँले विश्व राजनीति ठूलो परिवर्तनको दौरबाट गुज्रिरहेको भन्दै नेपालका अन्तर्राष्ट्रिय सम्बन्धहरू पनि त्यही अनुसार परिवर्तन भइरहेको बताउनुभयो। उहाँले भन्नुभयो, ‘नेपाल भू–राजनीतिक रूपमा संसारका पहिलो र दोस्रो जनसंख्या भएका देशहरू—चीन र भारतको बीचमा रहेको छ। चीन तीव्र रूपमा समृद्धि तर्फ अघि बढिरहेको छ। हामी यो अवसरलाई नेपाली जनताको समृद्धि र खुशीका लागि काम गर्न उपयोग गर्न चाहन्छौं।’