बाढीपहिरोका कारण तिब्बतको खासामा रोकिएका मालवाहक कन्टेनर मंगलबार बिहानबाट नेपालको रसुवागढी नाका भित्रिन थालेका छन्। बाढीपहिरोले रसुवा नाकाको केरुङतर्फको २४ किलोमिटर सडक क्षतिग्रस्त भएपछि दसैं, तिहार र छठका लागि झिकाइएका व्यापारिक मालबस्तु एक महिनादेखि रोकिएको कान्तिपुर दैनिकले लेखेको छ।

रसुवाका प्रमुख जिल्ला अधिकारी अर्जुन पौडेलले बिहानबाट कन्टेनर तथा साना गाडी नेपाल भित्रन थालेको जानकारी दिनुभएको हो। चिनियाँ अधिकारीहरुले सामानसहित १३ टन तौल भएका मालवाहक गाडी मात्र एकतर्फी आउजाउ गर्नसक्ने सूचना सोमबार नेपाललाई पठाएको थियो।

चिनियाँ अधिकारीहरुले दिएको सूचना उद्दृत गर्दै प्रजिअ पौडेलले कन्टेनरहरु बिहान केरुङबाट नेपाल आउने र बेलुकी नेपालबाट सामान बोक्ने खाली कन्टेनर केरुङ जाने तालिका मिलाइएको छ। बिहान केरुङबाट सामान लोड गरेका कन्टेनर तथा साना गाडी कम्तिमा ५० वटा भित्रने सूचना प्राप्त भएको रसुवा भन्सार अधिकृत तथा सूचना अधिकारी रविन्द्र प्याकुरेलले जानकारी दिनुभयो।

केरुङको गोदाममा राखेका र कन्टेनरमा लोड गरेको व्यापारिक मालबस्तु हजारौं टन छन्। सीमित तौलको सामान बोकेको कन्टनेर मात्र आउजाउ गर्न पाउने भएकाले नेपाली व्यवसायीको मालबस्तु सहज रुपमा नेपाल भित्रिन धेरै समय लाग्न सक्छ।

नेपाल हिमालय सीमापार वाणिज्य संघका अध्यक्ष रामहरि कार्कीले केरुङका ६ सय भन्दा बढी कन्टेनर सामान रहेको बताउनुभयो। फलफूलका कन्टेनर २० टनसम्म हुने भएकाले तोकिएको तौल न्यून भएको उहाँले बताउनुभयो। फलफूलका कार्टुन सानो गाडीमा लोड गरेर ल्याउँदा भाडा महँगो पर्ने उहाँले भन्नुभयो। बाढी अघि एक नेपाली कन्टेनर सामान काठमाडौं ल्याउने ढुवानी भाडा ९० हजार रहेकोमा अहिले २ लाख पुर्‍याइएको गुनासो व्यवसायीहरूको रहेको छ।

प्याकुरेलका अनुसार कन्टेनरहरु बिहान ८ बजेदेखि ११ बजेसम्म केरुङबाट रसुवा आउने र यताबाट बेलुकी ४ बजेपछि केरुङ जाने तालिका बनाइएको छ। बिहान ११ बजेदेखि बेलुकी ४ बजेसम्म चिनियाँहरुले क्षतिग्रस्त सडक बनाउने समय निर्धारण गरेका छन्। केरुङतर्फको सडक धेरै बिग्रेको सीमा अधिकारीहरु बताउँछन्।

कतिपय स्थानमा त सडकको नामोनिसाना मेटिएको छ। कतिपय स्थानको पुरै सडक भोटेकोशीमा खसेको केरुङबाट फर्केका व्यवसायी बताउँछन्। सडक पैदल हिँड्न पनि नहुने भएपछि दसैंअघि चिनियाँ सुरक्षाकर्मीको सहयोगमा नेपालीहरु केरुङबाट सीमासम्म आएका थिए।

विशेषगरी स्याउ, आँप, किबी, ओखर, लसुनलगायतका कुहिने र सडेर जानसक्ने खाद्यबस्तुको आयात हुन नसक्दा नेपाली व्यवसायीले करोडौं नोक्सानी बेहारिसकेका छन्। चाडबाड केन्द्रित गरेर आयात गरेका व्यापारिक सामान पनि यस वर्ष बिक्री गर्न नसकिने भएको छ। यस अवधिमा लाखौं मुल्यका स्याउन कुहिएको छ। स्याउका कतिपय कन्टेनर केरुङको कोल्डस्टोरमा राखिएको छ।