नोभेम्बर ८ तारिख दिउँसो चिनियाँ राष्ट्राध्यक्ष सी चिनफिङले पैचिङको जनबृहत सभाभवनमा चीनको राजकीय भ्रमणमा आउनुभएका इटालीका राष्ट्रपति सेर्गिओ माट्टारेल्लासँग भेटवार्ता गर्नुभयो।

भेटमा राष्ट्राध्यक्ष सी चिनफिङले ७ वर्षपछि चीनको अर्को राजकीय भ्रमणमा राष्ट्रपतिलाई स्वागत गर्नुभयो। उहाँले भन्नुभयो, “तपाईं चिनियाँ जनताको पुरानो मित्र र मेरो असल साथी हुनुहुन्छ। यो वर्ष चीन र इटालीबीच चौतर्फी रणनीतिक साझेदारी सम्बन्ध स्थापना भएको २०औं वार्षिकोत्सव हो। राष्ट्रपतिको भ्रमणले नयाँ ऐतिहासिक सुरुवात बिन्दुमा चीन-इटाली सम्बन्धको विकासमा अझ बलियो प्रेरणा दिने र दुई देशका जनतालाई थप लाभ पुर्याउने मलाई विश्वास छ।”

यो वर्ष मार्को पोलोको मृत्युको ७०० औं स्मृति भएको स्मरण गर्दै सीले १३औं शताब्दीको सुरुमा यी महान इटालियन यात्रीले विना पूर्वाग्रह चीनलाई चिन्न र वर्णन गरेकाले पश्चिमी संसारलाई चीन बुझ्नको लागि ढोका खोलेको बताउनुभयो।

आजको विश्वले हाल एक शताब्दीमा नदेखिने गहिरो परिवर्तनहरू अनुभव गरिरहेको भन्दै उहाँले दुई पुरातन सभ्यताको रूपमा चीन र इटालीले खुलापन र समावेशीतालाई अगाडि बढाउनुपर्ने र अन्तर्राष्ट्रिय समुदायलाई वार्ताको माध्यमबाट मतभेदहरू समाधान गर्न, सहकार्यको माध्यमबाट द्वन्द्वहरू हटाउन र मिलेर काम गरी सद्भाव र सह अस्तित्वको सुन्दर संसार निर्माण गर्नुपर्ने बताउनुभयो।