भगवान् श्री रामचन्द्रले रावणमाथि विजय हासिल गर्ने उद्देश्यले शक्तिप्राप्तिका लागी शक्तिस्वरुपा महामाया भगवतिको आवाहन गर्न घडाको स्थापना गरी बालुवाको चौकीमा जौ छरी पूजा आराधाना गरेको विश्वासमा आज हिन्दू धर्मालम्वीहरुले आ आफना पूजाकोठा वा दसैघरमा विधिपूर्वक दियो , कलश र गणेशको पूजा गर्ने र माटोको पूर्ण घडामा गाईको गोबर राखी घाम नछिर्ने अँध्यारो कोठामा जौ वा मकै रोपेर जमरा राखी पन्चरत्न चढाई शक्तिरुपी दुर्गा भवानीको आराधना गर्ने परम्परा छ । यसरी उमारिने जमरा विजयादशमीका दिन मान्यजनहरुबाट टिका ग्रहण गर्दा लगाईन्छ । दशैको टीका लगाउँदा अरु फूलको सट्टा समृद्धिको प्रतिक पहेलो जमरालाई प्रयोग गरिन्छ ।

            परम्पराअनुसार घटस्थापनाको उपलक्ष्मा आज हनुमान्ढोका दरबारमा रहेको दसै घरमा बैदिक विधिपूर्वक जमरा राखी महाकाली, कहालक्ष्मी , महासरस्वतीलगायत नवदुर्गा र अन्य शक्तिपीठहरुमा नवरात्रिपूजाको शुभारम्भ हुन्छ । नवरात्रिको उपलक्ष्मा नेपालभर बिहान घरघरमा र भगवतीका मन्दिरहरुमा चण्डी र भगवती स्तोत्र पाठ गर्ने गरिन्छ ।

            बडादसैको उपलक्ष्मा आजैदेखी नेपालभरका शिक्षण संस्था र अदालतहरु कोजाग्रत पूणिमाको दिनसम्मका लागी बिदा गरिएका छन् ।