चिनियाँ राष्ट्रिय जन-कांग्रेसको वार्षिक अधिवेशन भोलि पैचिङ्गमा सम्पन्न हुँदैछ। चिनियाँ जन-राजनैतिक परामर्शदात्री सम्मेलनको वार्षिक अधिवेशन पनि गत चौध तारिखका दिन सम्पन्न भएको छ। यसको सफलताका लागि शुभकामना व्यक्त गर्न थुप्रै नेपाली श्रोताले हामीलाई पत्र वा इ-मेल पठाउनुभएको छ।

         स्वर्णीम मित्रता श्रोता क्लबका कोषाध्यक्ष जुना खड्काले हामीलाई पठाउनुभएको इ-मेलमा यसरी लेख्नुभएको छः नयाँ चीनको अर्थतन्त्रलाई मजबुत बनाउँदै समाजवादी अर्थ व्यवस्थालाई नयाँ उचाइमा पुर्‍याउन यी दुबै अधिवेशन सफल होउन। थाइवान जल-डमरुका दुइ किनाराबीचको शान्तिपूर्ण विकास गर्दै थाइवानलाई चीनको पोल्टामा फर्काउने कार्यमा यी अधिवेशनले ठोस निर्णयहरु पारित गरून। आगामी ओलम्पिक खेलकुदको पूर्व सन्ध्यामा पैचिङ्गमा भैरहेको यी दुबै अधिवेशनले ओलम्पिक खेलकुदका लागि अझ राम्रो वातावरण र अझ फराकिलो दृष्टिकोण बनाउँदै उक्त खेलकुदको भव्य सफलताका निम्ति मार्ग प्रशस्त गर्न सकुन।