पाँचदिने नेपाल भ्रमणका क्रममा चिनियाँ कम्युनिष्ट पार्टीका नेता चाङ्ग कोली आज काठमाडौँ आइपुग्नु भएको छ । चिनियाँ कम्युनिष्ट पार्टीका पोलेट ब्युरो सदस्य चाङ्ग 17 सदस्यीय चिनियाँ प्रतिनधिमण्डलको नेतृत्व गर्दै आज बिहान काठमाडौँ आइपुग्नु भएको हो ।
माधवकुमार नेपाल प्रधानमन्त्रीमा निर्वाचित भएपछि नेपाल भ्रमणमा आउने चाङ्ग पहिलो चिनियाँ नेता हुनुहुन्छ । नेपाल भ्रमणका क्रममा उहाँले प्रधानमन्त्री माधवकुमार नेपाल, परराष्ट्रमन्त्री सुजाता कोइराला, अन्य मन्त्रीहरु तथा विभिन्न राजनीतिक दलका नेताहरुसँग भेट गर्नुहुनेछ ।
चिनियाँ नेता चाङ्गले आज अपरान्ह एकीकृत नेपाल कम्युनिष्ट पार्टी माओवादीका अध्यक्ष पुष्पकमल दाहाल प्रचण्डसँग भेट गर्नु भएको छ । भेटमा नेताहरुले दुवै पार्टीको सम्बन्धलाई अझै नजिक बनाउने र आपसी सम्बन्धलाई विस्तार गर्ने विषयमा कुराकानी भएको चिनियाँ दूताबासले सि.आर.आई.लाई बताएको छ । चिनियाँ नेता चाङ्गको सम्मानमा नेपाल चीन मैत्री सम्बन्धमा कार्यरत विभिन्न संघसंस्थाले आगामी सेप्टेम्बर 3 तारिख रात्रिभोजको आयोजना गरेका छन् ।
यसैबीच नेपालका लागि चिनियाँ राजदूत छ्वु कोहोङ्गले प्रधानमन्त्री माधवकुमार नेपालसँग हिजो भेट गर्नु भएको छ । भेटका क्रममा राजदूत छ्वुले प्रधानमन्त्री नेपाललाई चीन भ्रमणका लागि चिनियाँ प्रधानमन्त्रीले पठाउनु भएको निमन्त्रणा पत्र दिनु भएको प्रधानमन्त्रीका विदेशमामिला सल्लाहकार राजन भट्टराईले सि.आर.आई.लाई बताउनुभयो । प्रधानमन्त्री नेपालले चीन भ्रमण गर्नुपूर्व परराष्ट्रमन्त्री कोइरालाले चीनको भ्रमण गर्नुहुने पनि विदेशमामिला सल्लाहकार भट्टराईले बताउनुभयो ।
चेतनाथ आचार्य
सि.आर.आई.
काठमाडौँ
|