पाँचदिने नेपाल भ्रमणका क्रममा हिजो काठमाडौँ आइपुग्नु भएका चिनियाँ कम्युनिष्ट पार्टीको स्थायी समिति सदस्य चाङ्ग कोलीले आज प्रधानमन्त्री माधवकुमार नेपाल र राष्ट्रपति डा. रामवरण यादवसँग भेट गर्नु भएको छ।
चिनियाँ दूताबासले सि.आर.आई.लाई दिएको जानकारी अनुसार चिनियाँ नेता चाङ्गले दुवै नेतासँग दुई पक्षीय सहयोगका बारेमा छलफल गर्नु भएको छ । राष्ट्रपति भवन सितल निवासमा भएको भेटघाटमा नेपालका लागि चिनियाँ राजदूत छ्वु कोहोङ्गको पनि उपस्थिति थियो ।
चिनियाँ नेता चाङ्गले आजै प्रधानमन्त्री माधवकुमार नेपालसँग पनि भेट गर्नु भएको छ । भेटका क्रममा नेपालको भूमिबाट हुने चीन बिरोधी गतिविधिका बारेमा चिनियाँ नेताले चासो राख्नु भएको प्रधानमन्त्रीका विदेश मामिला सल्लाहकार राजन भट्टराईले सि.आर.आई.लाई बताउनुभयो । प्रधानमन्त्री नेपालले चिनियाँ नेतासँग नेपालले सधैँ एक चीनको नीतिलाई समर्थन गरेको बताउँदै नेपालको भूमि छिमेकी मित्रराष्ट्र चीन बिरोधी क्रियाकलापमा प्रयोग हुन नदिन आफू प्रतिवद्ध रहेको बताउनुभयो ।
त्यसैगरी आजै चिनियाँ प्रतिनिधिमण्डलले नेपाल कम्युनिष्ट पार्टी एमालेका अध्यक्ष झलनाथ खनालसँग पनि भेट गरेको छ । भेटका क्रममा चिनियाँ कम्युनिष्ट पार्टी र नेकपा एमालेबीचको भाइचारा सम्बन्धलाई अझै गाढा बनाउने विषयमा कुराकानी भएको खनालका निजी सचिव रामबाबु अधिकारीले बताउनु भएको छ ।
चिनियाँ प्रतिनिधिमण्डल आगामी 4 तारिख बिहान नेपालबाट श्रीलंका प्रस्थान गर्नेछ।
चेतनाथ आचार्य
सि.आर.आई.
काठमाडौँ
|