नेपाल भ्रमणमा रहनु भएका चिनियाँ कम्युनिष्ट पार्टी स्थायी समिति सदस्य चाङ्ग कोलीले नेपालका मुख्य राजनीतिक दलका नेताहरुसँग भेट गरी छलफल गर्नु भएको छ । वर्तमान सत्ताधार प्रमुख दल नेकपा एमाले र नेपाली कांग्रेसका नेताहरुसँग भेट गरी नेपाललाई प्राप्त हुँदै आएको चिनियाँ सहयोगलाई वृद्धि गर्दै लगिने कुरा पनि चिनियाँ नेताले व्यक्त गर्नु भएको छ ।
नेपाली कांग्रेसका सभापति पूर्व प्रधानमन्त्री गिरिजाप्रसाद कोइरालासँग हिजो अपरान्ह चिनियाँ प्रतिनिधिमण्डलले भेट गरेको थियो । भेटका क्रममा चिनियाँ नेता चाङ्गले नेपालको शान्ति पक्रियामा चीनले समर्थन गरेको बताउँदै संविधान निर्माण तथा राजनीतिक सहमतिका बारेमा चासो व्यक्त गर्नु भएको छ ।
चिनियाँ नेता चाङ्गले सबै राजनीतिक दलका नेताहरुसँगको भेटमा नेपाल र चीनबीचको मैत्री सम्बन्धलाई एक्काईसौँ शताब्दीमा कसरी अझै मजबुत बनाउन सकिन्छ भन्ने विषयलाई केन्द्रविन्दु बनाउनु भएको सम्बन्धित पक्षले सि.आर.आई.लाई बताएको छ । विशेष गरी नेपालको भूमि समय समयमा चीन बिरोधी गतिविधिमा प्रयोग भएको, दलाई गुटले भारतबाट नेपालमा प्रवेश गरी चीनको स्वायत्त प्रदेव तिब्बतका विरुद्धमा प्रचारवाजी गरेको कुरालाई चिनियाँ नेताले गम्भीरतापूर्वक उठाउनु भएको छ । प्रत्युत्तरमा नेपाली नेताहरुले चिनियाँ नेतालाई नेपाल सदैव एक चीनको नीतिमा अडिग रहेको र नेपालको भूमि चीन विरोधी क्रियाकलापमा प्रयोग गर्न नदिने प्रतिवद्धता व्यक्त गर्नु भएको छ ।
यसैगरी राष्ट्रपति डा. रामवरण यादव र प्रधानमन्त्री माधवकुमार नेपाललाई चिनियाँ समकक्षी नेताहरुले चीन भ्रमणका लागि पठाउनु भएको निमन्त्रणापत्र चिनियाँ नेता चाङ्गले हस्तान्तरण गर्नु भएको छ ।
चेतनाथ आचार्य
सि.आर.आई.
काठमाडौँ
|