चीनको ग्वाङ्चोउमा आयात निर्यातसम्बन्धी सबैभन्दा ठूलो मेलाको आयोजना हुने भएको छ । आगामी अक्टोबर 15 देखि 21 गतेसम्म सञ्चालन हुने सो मेला 106 औँ पटक आयोजना गर्न लागिएको हो । मेलामा नेपालले पनि भाग लिने भएको छ ।
नेपाल चीन उद्योग वाणिज्य संघका अध्यक्ष राजेशकाजी श्रेष्ठले सि.आर.आई.लाई दिनु भएको जानकारी अनुसार चीनमा अयोजान हुने मेलामध्येको सबैभन्दा ठूलो उक्त मेलामा 22 हजारभन्दा बढी स्टल रहनेछन् । मेला तीन चारणमा गरी आयोजना हुने श्रेष्ठले बताउनुभयो ।
अक्टोबर 15 तारिबाट चल्ने पहिलो चार दिनको मेलामा इलेक्ट्रोनिक्स तथा विद्युतीय र घरायसी सामानहरु प्रदर्शनमा रहनेछन् । त्यसैगरी हार्डवेयर सामाग्री, मेसिनरी यातायात तथा त्यसका पाटपुर्जा निर्माण सामाग्री र केमिकल्सको प्रदर्शन पनि गरिनेछ ।
आयोजकलाई उद्धृत गर्दै श्रेष्ठले बताउनु भए अनुसार दोस्रो चरणमा उपभोग्य र उपहारको सामानहरु प्रदर्शन गरिने छ । त्यसैगरी तेस्रो चरणमा गार्मेन्ट, टक्साटाइल र मनोरञ्जनको सामानहरुको प्रदर्शन गरिनेछ । यसरी मेला चरणवद्ध रुपमा सम्पन्न हुनेछ ।
उक्त मेलामा नेपालको तफबाट नेपाल चीन उद्योग वाणिज्य संघका अध्यक्ष राजेशकाजी श्रेष्ठको नेतृत्वमा एक व्यापारिक टोली ग्वाङ्चोउ जाने र सो मेलामा नेपालको तफबाट दुईवटा सदस्य कम्पनीले नेपाली हस्तकलाका सामान प्रदर्शनीमा राख्ने भएको छ ।
चेतनाथ आचार्य
सि.आर.आई.
काठमाडौँ
|