गत 11 तारिखदेखि नेपाल प्रज्ञाप्रतिष्ठान कमलादीमा आयोजना भइरहेको चौथो चीन महोत्सवको मुख्य आकर्षष चिनियाँ एक्रोव्याटिक भएको छ। चिनियाँ कलाकारहरुले प्रदर्शन गर्ने एक्रोव्याटिकलाई दर्शक तथा सञ्चार माध्यमले प्राथमिकतामा राखेका छन् ।
चिनियाँ कलाकारहरुले एउटै साइकलमा बसेर देखाएको कला अथवा आगो बलिरहेको रिङ्गभित्र पसेर प्रदर्शन गरेको कलाले दर्शकलाई आश्चर्यचकित बनाउने गर्दछ । कलाकारको कलाले दर्शकलाई हलभित्र जुरुकजुरुक उठाउने गर्दछ । कतिपय दृश्यले त दर्शकको शरीर नै सिरिङ्ग बनाउने काम पनि गर्दछ।
दर्शकले पत्याउनै नसक्ने गरी एक्रोव्याटिक कलाकारले देखाउने शरीरको लचकता र कला हेर्दाहेर्दै समय बितेको पत्तै हुँदैन । दर्शकको गडगडाहट ताली र हौसलाले चिनियाँ कलाको उच्च मूल्यान हुने गरेको छ । कतिपय सोमा त चिनियाँ कलाकारहरुले नेपाली पोशाक लगाएर मञ्चमा उपस्थित हुँदा दुवै राष्ट्रबीचको भावनात्मक सम्बन्धलाई समेत कसिलो बनाउने कुरा स्पष्ट झल्काएको देखिन्छ ।
चिनियाँ दूताबासको आयोजनामा चीनको च्याङ्सु प्रान्तबाट कलाकारहरु आएर चौथो चिनियाँ महोत्सव प्रदर्शन गरिरहेका छन् । महोत्सवमा चिनियाँ एक्रोव्याटिक बाहेक फेसन सो, चिनियाँ गीत तथा नृत्य तथा अन्य विविध कलाका विषयहरु प्रदर्शन गरिँदै छ । प्रदर्शनीको गत 11 तारिखमा प्रधानमन्त्री माधवकुमार नेपालले उद्घाटन गर्नु भएको थियो । आगामी 16 तारिखसम्म चल्ने चौथो चिनियाँ महोत्सवलाई नेपाली दर्शकले मन पराएको कुराले नेपालमा चिनियाँ कला र संस्कृति लोकप्रिय हुँदै आएको प्रमाषित हुन्छ।
चेतनाथ आचार्य
सि.आर.आई.
काठमाडौँ
|