चीन सरकारारा बेइजिङमा आयोजित विकासशील राष्ट्रहरुको रेडियो र टेलिभिजनसम्बन्धी मन्त्रीस्तरीय कार्याशालाको उद्घाटन कार्यक्रममा बोल्दै सूचना तथा सञ्चार मन्त्री शंकर पोखरेलले दुई देशबीचको मैत्री सम्बन्धलाई अगाडि बढाउन सञ्चार माध्यमले महत्वपूर्ण भूमिका निर्वाह गरेको बताउनु भएको छ ।

             मन्त्री पोखरेलका प्रेस सल्लाहकार प्रमोद दाहालले सि.आर.आई.लाई बताउनु भए अनुसार मन्त्री पोखरेलले दुवै देशका साझा कुराहरुलाई सञ्चार माध्यमले आदानप्रदान गर्ने कुरालाई अझै मजबुत बनाउनुपर्ने कुरालाई जोड दिनुभएको छ ।

             सूचना तथा सञ्चारमन्त्री पोखरेलले नयाँ संविधान निर्माणसँगै शान्त र समृद्ध नेपालको ढोका खुल्ने कुरामा नेपाली जनता विश्वस्त रहको पनि बताउनु भएको सल्लाहकार दाहालले जानकारी दिनुभयो ।

             अन्तर्राष्ट्रिय जगतमा नेपालको सूचना प्रवाह गर्ने तथा चीन र नेपालबीचको मैत्री भावनालाई आँच आउन नदिने कुरामा नेपाली सञ्चार माध्यमले जिम्मेवारी वहन गर्दै आएको पनि मन्त्री पोखरेलले सो अवसरमा बताउनुभयो ।

             मन्त्री पोखरेलले नेपालका सार्वजनिक तथा निजी क्षेत्रका रेडियो तथा टेलिभिजनको भूमिका अझै प्रभावकारी बनाउन सरकार तयार रहेको पनि बताउनुभयो। उहाँले नयाँ नीति तथा प्रविधि आत्मसात गर्ने बताउँदै नेपाल टेलिभिजन र नेपालको दूरसञ्चारको विकासमा चिनियाँ सहयोगको प्रशंसा गर्दै आउँदा दिनमा पनि सूचना प्रविधिको क्षेत्रमा थप चिनियाँ सहयोग प्राप्त हुने विश्वास व्यक्त गर्नुभयो ।

चेतनाथ आचार्य

सि.आर.आई.

काठमाडौँ