चीनका राष्ट्राध्यक्ष हु चिंग थाउ गणतन्त्र मोजाम्बिकका राष्ट्रपति अर्मान्डो एमिल्लो गुएबुजाको निमन्त्रणामा मोजाम्बिकको राजकीय भ्रमणका लागि आज राजधानी मापुतो पुग्नुभयो।

           राष्ट्रपति गुएबुजाले विमानघाटमा चीनका राष्ट्राध्यक्ष हुको सम्मानमा भव्य स्वागत समारोहको आयोजना गर्नुभयो। विमान स्थलमा लिखित मन्तव्य सार्वजनिक गर्दै चीनका राष्ट्राध्यक्ष हु चिंग थाउले चीन र मोजाम्बिक बीच दौत्य सम्बन्ध स्थापना भएको एकतीस वर्षदेखियता यी दुइ मुलुकका पुराना पुस्ताका नेताद्बारा हुर्काइएको चीन-मोजाम्बिक मित्रता निरन्तर रुपमा विकसित हुँदैगएको कुरा वताउनु भयो।

           आफ्नो मोजाम्बिक भ्रमणको उद्देश्य चीन र अफ्रिका बीचको मित्रतालाई खँदिलो पार्नु, चीन-अफ्रिका सहयोग मञ्चको पैचिंग शिखर सम्मेलनका निर्णयहरुलाई व्यवहारमा उतार्नु, व्यावहारिक सहयोगलाई विस्तृत पार्नु, साझा विकासलाई अघि बढाउनु र मोजाम्बिकसितै मिलेर दुइ देश बीचको सम्बन्धको थप विकास गर्नु भएको कुरा श्री हुले वताउनु भयो।