नेपालभरि छरिएर रहेका हाम्रा श्रोता क्लवहरुको छाता संगठन सी.आर.आई. श्रोता क्लबहरुको राष्ट्रिय परिषद् नेपाल स्थापना भएको आज बाह्र वर्ष पूरा भएको छ। राष्ट्रिय परिषद् बाह्रौं वर्षमा प्रवेश गरेको यो सुखद अवसरमा हामी हाम्रा सम्पूर्ण नेपाली श्रोता, श्रोता क्लब एवम् राष्ट्रिय परिषद्का पदाधिकारीहरुलाई हार्दिक बधाई दिन चाहन्छौं। सीआरआईको महान लक्ष्यलाई पूर्णरुपमा समर्थन जनाउँदै हामीसँग होस्तेमा हैसै गरेर अगाडि बढिरहेको राष्ट्रिय परिषद्ले विगत एघार वर्षमा चीन र नेपालबीचको परम्परागत मित्रतालाई जनस्तरबाट प्रवर्द्धन गर्नका लागि अथक प्रयास गर्दै आइरहेको छ। नयाँ श्रोता क्लव खोल्न, श्रोता क्लवहरुबीचको एकतालाई कायम राख्न एवम् श्रोता क्लबहरु र हामीबीचको सामिप्यतालाई बढाउन पनि राष्ट्रिय परिषद्ले उल्लेखनीय भूमिका खेलेको छ। यसको उच्च मुल्यांकन गर्दै हामी हाम्रा सबै श्रोतालाई धन्यवाद दिन चाहन्छौं। आगामी दिनहरुमा राष्ट्रिय परिषद्ले अझ धेरै नेपाली श्रोता र श्रोता क्लबहरुलाई समेट्न सकोस् भन्ने कामना गर्दै तमाम नेपाली श्रोता, श्रोता क्लब एवम् राष्ट्रिय परिषद्को उत्तरोतर प्रगतिका लागि हामी हार्दिक शुभकामना दिन चाहन्छौं।