 चीन अध्ययन केन्द्र र समसामयिक अन्तर्राष्टि्रय सम्बन्धका लागि चिनियाँ संस्थाबीचमा दुई पक्षीय सम्झौता भएको छ । यही जुलाई 7 तारिख शनिबार काठमाडौँमा भएको दुई पक्षीय सम्झौतामा चीन अध्ययन केन्द्रका अध्यक्ष मदन रेग्मी तथा चिनियाँ संस्थाको तफबाट उपाध्यक्ष लि साओसियानले हस्ताक्षर गर्नुभएको छ ।
प्राज्ञिक आदानप्रदान तथा सहयोग सम्बन्धी महासन्धी भनिएको सम्झौतापत्रमा 11 वटा बुँदाहरु रहेका छन् । यो सम्झौताबाट संस्थागत आधार तयार भएको र दुबै संस्था समकक्षी रुपमा रहेको चीन अध्ययन केन्द्रका महासचिव डा. उपेन्द्र गौतमले सि.आर.आई.लाई बताउनुभयो । आगामी दिनमा दुबै संस्था मिलेर काम गर्ने प्रतिवद्धता पनि सम्झौतामा उल्लेख छ । सम्झौतामा राखिएका मुख्य बुँदाहरुमा हरेक वर्ष आलोपालो गरेर दुबै संस्थाले प्राज्ञिक प्रतिनिधिमण्डलको आदानप्रदान गर्नेछन् । त्यसैगरी दुबै संस्थाले संयुक्त रुपमा अनुसन्धान गर्नेछन् भने आ-आफ्ना प्रकाशनहरु पनि आदानप्रदान गर्नेछन् ।
नेपाल र चीनमा कृयाशील नीतिगत विषयका अनुसन्धान तथा विश्लेषण गर्ने र खोज अनुसन्धान गर्ने काम पनि यस सम्झौतापत्रमा उल्लेख छ । समसामयिक अन्तर्राष्टि्रय सम्बन्धका लागि चिनियाँ संस्था सन् 1981 मा स्थापन भएको हो । यो चिनियाँ प्राध्यापकहरु तथा अनुसन्धाताहरुको साझ मञ्च हो । अहिले नेपालमा रहेको यस संस्थाका उपाध्यक्ष लि साओसियानको नेतृत्वको प्रतिनिधिमण्डल नेपाल आएको पहिलो प्रतिनिधिमण्डल हो । संस्थाको पहिलो नेपाल भ्रमणमा नै चीन अध्ययन केन्द्रसँग सम्झौतामा हस्ताक्षर भई समकक्षी सम्बन्ध विस्तार हुनु महत्वपूर्ण मानिन्छ ।
चीन अध्ययन केन्द्रले यसभन्दा अगाडि सन् 1999 मा चिनिया एसोसिएसन फर इन्टरनेसनल प्रेण्ड्ली कोअपरेसनसँग दुई पक्षीय सम्झौतामा हस्ताक्षर भइसकेको छ । चीन अध्ययन केन्द्रले अन्य थुप्रै चिनियाँ संघसस्थासँग मिलेर नेपालमा चीन र नेपालबीचको मैत्री सम्बन्ध विस्तार गर्ने काम गरिरहेको छ ।
सि.आर.आई.काठमाडौँ
|
