आगामी सेप्टेम्बर महिनामा काठमाडौँको वीरेन्द्र अन्तर्राष्ट्रिय सम्मेलन केन्द्रमा तेस्रो चीन महोत्सव हुने भएको छ। चिनियाँ दूताबासको संयोजनमा आयोजना हुने उक्त महोत्सव सेप्टेम्बर 12 तारिखदेखि 22 तारिखसम्म रहनेछ।

      चिनियाँ दूताबासले सि.आर.आई.लाई दिएको जानकारी अनुसार चीन महोत्सव नेपालमा चीनलाई चिनाउने सबैभन्दा प्रभावकारी माध्यम हुनेछ। यसभन्दा अगाडि चिनियाँ दूताबासको संयोजनमा आयोजना भएको पहिलो र दोस्रो चीन महोत्सव पूर्ण रुपमा सफल भएको र अब हुने तेस्रो चीन महोत्सव विगतमा भन्दा बढी प्रभावकारी हुने कुरालाई दूताबासले जोड दिएको छ।

      अहिले चीन महोत्सवको तयारी द्रुत गतिमा अगाडि बढिरहेको छ। चीनका ख्यातिप्राप्त कलाकारहरु चिनियाँ संस्कृतिलाई प्रस्तुत गर्नका लागि अभ्यासमा जुटिरहेका छन्। त्यसैगरी प्रदर्शनीमा राखिने विभिन्न वस्तुहरु चीनबाट नेपालमा ल्याउने काम पनि भइरहेको छ। तेस्रो चीन महोत्सवको मुख्य आकर्षणका रुपमा आगामी वर्ष चीनमा आयोजना हुने ओलम्पिक खेलकूद पनि रहनेछ।

      चिनियाँहरुको जीवनशैली देखाउने खालका झाँकीहरु, गीतसङ्गीतहरु, परम्परागत चिनियाँ ओपेराहरु, चित्रकलाहरु प्रदर्शनीमा राखिनेछन्। त्यसैगरी चिनियाँ पर्यटन क्षेत्रका आकर्षणहरु, कृषि तथा वातावरणका दृश्यहरु, शहर तथा गाउँका बासिन्दाको जीवनस्तरका साथै विज्ञान तथा प्रविधिमा चीनले हालसम्म हासिल गरेका उपलब्धीलाई पनि प्रदर्शनीमा राखिनेछ। वर्तमान समयमा चिनियाँ उत्पादनले संसारमै प्रभुत्व जमाइसकेको छ। त्यसकारण नेपालमा लोकप्रिय मानिएका चिनियाँ उत्पादनलाई पनि चीन महोत्सवमा प्राथमिकताका साथ प्रस्तुत गरिनेछ।

      तेस्रो चीन महोत्सवलाई सफल बनाउनका लागि सबै नेपाली सञ्चारमाध्यमको सहयोगलाई चिनियाँ दूताबासले महत्वपूर्ण मानेको छ। त्यसकारण तयारी कार्यसँगसँगै यसको प्रचारप्रसारलाई पनि अगाडि बढाउने निर्णय दूताबासले गरेको छ।

      चेतनाथ आचार्य

      सि.आर.आई.

      काठमाडौँ