चीन सरकारले यो वर्ष 45 जना नेपाली विद्यार्थीहरुलाई प्राविधिक शिक्षा अध्ययनका लागि छात्रवृत्ति प्रदान गरेको छ। चिनियाँ सरकारले नेपाल सरकारको शिक्षा मन्त्रालयमाफत नेपाली विद्यार्थीलाई छात्रवृत्ति दिँदै आएको छ । वितगका तुलनामा यो वर्ष चीन सरकारले दिएको छात्रवृतिको संख्या उल्लेख्य रुपमा बढेको हो।

      शिक्षा तथा खेलकूद मन्त्रालयका सहसचिव तथा प्रवक्ता लवप्रसाद त्रिपाठीले सि.आर.आई.लाई दिनुभएको जानकारी अनुसार चालु वर्ष सन्‍ 2007 मा चीनमा गएर अध्ययन गर्न पाउने 45 जना जना विद्यार्थीहरुमा चिकित्साशास्त्र संकायमा स्नातक गर्नका लागि तीनवटा छात्रवृत्ति छन् भने चिकित्साशास्त्र संकाय अन्तर्गत नै विभिन्न विषयमा स्नातकोत्तर तहका त्रिचालीसवटा छात्रवृत्ति रहेका छन् ।

      चीन सरकारले नेपालको शिक्षा तथा खेलकूद मन्त्रालयमाफत सन्‍ 2004 मा 6 वटा स्नातक तहका लागि र 14 वटा स्नातकोत्तर तहका गरी जम्मा बीसवटा छात्रवृत्ति प्रदान गरको थियो । त्यसैगरी सन्‍ 2005 मा दसवटा स्नातक तहका लागि र 15 वटा स्नातकोत्तर तहका गरी जम्मा पच्चीसवटा छात्रवृत्ति प्रदान गरको थियो । गतवर्ष सन्‍ 2006 मा 4 वटा स्नातक तहका र 11 वटा स्नातकोत्तर तहका गरी जम्मा 15 वटा छात्रवृत्ति प्रदान गरेको थियो। यो वर्ष गतवर्षभन्दा यो वर्ष चीन सरकारले तेब्बर बढी 45 वटा छात्रवृत्ति नेपाललाई प्रदान गरेको हो।

      शिक्षा तथा खेलकूद मन्त्रालयका सहसचिव तथा प्रवक्ता लवप्रसाद त्रिपाठीका अनुसार चीनमा गएर प्राविधिक शिक्षा लिएर नेपाल फर्किएका विद्यार्थीहरुले विभिन्न क्षत्रमा गुणस्तरीय सेवा प्रदान गरिहेका छन्। यसै कारणले पनि चीनमा गएर उच्च शिक्षा लिन विद्यार्थीहरुमा चासो र रुचि क्रमश: बढिरहेको देखिन्छ। सरकारी निकायबाहेक गैर सरकारी तथा नेपाली चीन मैत्री संघसंस्थाहरुले पनि चीनमा अध्ययन गर्नका लागि नेपाली विद्यार्थीहरुलाई विभिन्न संख्यामा छात्रवृत्ति प्रदान गरिरहेका छन्।

      चेतनाथ आचार्य

      सि.आर.आई.

      काठमाडौँ