|
 चीनको सिन्ह्वा समाचार समिति र नेपालको राष्ट्रिय समाचार समितिबीच आज छलफल भएको छ । राष्ट्रिय समाचार समितिको कार्यकक्षमा आज अपरान्ह दुईपक्षीय सम्बन्धलाई बिस्तार गर्ने बारेमा छलफल भएको हो । चीनबाट नेपाल भ्रमणमा आएको सिन्ह्वाको चार सदस्यीय प्रतिनिधिमण्डले राष्ट्रिय समाचार समितिका अध्यक्ष तारानाथ दाहाललाई उपहार स्वरुप कम्प्युटर पनि प्रदान गरेको छ ।
नेपालको राष्ट्रिय समाचार समिति र चीनको सिन्ह्वा समाचार समितिबीचमा लामो समयदेखि अत्यन्त घनिष्ट सम्बन्ध स्थापना भएको छ । प्रतिनिधिमण्डलका नेता तथा सिन्ह्वा समाचार समिति जनशक्ति विभागका महानिर्देशक लिउ वाईले नेपालको राष्ट्रिय समाचार समितिसँग मिलेर काम गर्न पाएकोमा खुशी व्यक्त गर्नुभयो । दुई देशबीचको सम्बन्धको जति महत्व छ त्यति नै महत्व समाचार आदानप्रदानमा रहेको बताउँदै लिउले भन्नुभयो। हामी एक अर्कामा अनुभव साटासाट गर्न आएका हौँ । उहाँले राष्ट्रिय समाचार समितिलाई दुईवटा कम्प्युटर र एउटा प्रिन्टर उपहार पनि प्रदान गर्नुभयो ।
राष्ट्रिय समाचार समिति र सिन्ह्वा समाचार समितिबीचको यो नियमित भ्रमण हो । सिन्ह्वाले राष्ट्रिय समाचार समितिका अध्यक्ष तारानाथ दाहाललाई चीन भ्रमण गर्ने निम्तो पनि दिएको छ । सिन्ह्वा समाचार समितिको प्रतिनिधिमण्डलले राष्ट्रिय समाचार समितिको समाचार कक्ष, सम्पादन कक्ष, प्रशासन विभाग तथा बजार व्यवस्थापन विभागको पनि अवलोकन गर्यो।
परम्परादेखि स्थापित सम्बन्धलाई अझै सुदृढ पार्नका लागि यस खालका भ्रमणको महत्व रहेको राष्ट्रिय समाचार समितिका अध्यक्ष तारानाथ दाहालले बताउनुभयो । अध्यक्ष दाहालले एक्काईसौँ शताब्दीमा विश्वलाई सानो गाउँमा परिणत गर्नका लागि समाचार माध्यम र समाचार एजेन्सीले काम गरेको बताउँदै सिन्ह्वा संसारकै ठूला समाचार समितिमध्ये एक रहेको पनि बताउनुभयो । राष्ट्रिय समाचार समितिलाई सहयोग गरेकोमा धन्यवाद दिँदै सिन्ह्वा समाचार समितिका समाचार नेपालमा निकै लोकप्रिय रहेको पनि अध्यक्ष दाहालले बताउनुभयो ।
चेतनाथ आचार्य
सि.आर.आई.
काठमाडौँ
|
