 नेपाल चीन उद्योग वाणिज्य संघले नेपाल चीन आर्थिक सम्बन्धका अवसरहरु विषयक गोष्ठीको आयोजना गरेको छ । हिजो बुधबार काठमाडौँमा आयोजित सो गोष्ठीमा विभिन्न वक्ताहरुले दुई देशबीचको व्यापारिक सम्बन्धमा प्रकाश पार्नुभएको थियो ।
नेपाल चीन उद्योग वाणिज्य संघका अध्यक्ष राजेशकाजी श्रेष्ठले नेपालबाट चीन निकासी हुने सामानको भन्सार शुल्क शुन्यमा झारी व्यापार घाटा कम गर्न चिनियाँ सरकारसँग अनुरोध गर्नुभयो । उहाँले हस्तकलाका सामान, खाद्यसामग्री तथा जडीबुटी जस्ता निकासीजन्य सामानहरु नेपालबाट चीनको तिब्बत जाने गरेको बताउँदै दुई देशबीचमा व्यापारको संभावना ठूलो रहेकोमा जोड दिनुभयो ।
सो गोष्ठीमा नेपाल कम्युनिष्ट पार्टी माओवादीका वरिष्ठ नेता डा. बाबुराम भट्टराईले जलविद्युत क्षेत्रमा चिनियाँ लगानीलाई आकषित गर्न स्पष्ट नीति बनाउनु पर्न् बताउँदै बढी उत्पादन भएको विद्युत चीनलाई बेच्न सकिने सुझाव दिनुभयो । कार्यक्रममा नेपाल चीन उद्योग वाणिज्य संघका कार्यसमिति सदस्य प्रदीपज पाण्डेले कार्यपत्र प्रस्तुत गर्नुभएको थियो ।
यसैगरी आजै अपरान्ह नेपालस्थित चिनियाँ दूताबासका काउन्सिलर सि हुईले बाढी पहिरोमा परेका पीडितलाई सहयोग स्वरुप चीनको तिब्बत सरकारले प्रदान गरेको सहयोग सामग्री नेपाल रेडक्रस सोसाइटिलाई हस्तान्तरण गर्नुभयो । नेपाल रेडक्रस सोसाइटिको सभाकक्षमा आयोजित समारोहमा दूताबासका काउन्सिलर सि हुईले नेपाल रेडक्रस सोसाइटीका अध्यक्ष संजीव थापालाई हस्तान्तरण गर्दै दुई देशको पारस्पारिक सहयोगमा यो सानो सहयोग भएको बताउनुभयो । सोसाइटिका अध्यक्ष थापाले चीन सरकार र चिनियाँ जनतालाई सहयोग गरेकोमा धन्यवाद प्रदान गर्नुभयो ।
चीनको स्वायत्त प्रदेश तिब्बतले तीन लाख चिनियाँ युयान अर्थात् 27 लाख नेपाली रुपैयाँ बराबरको विभिन्न सामग्रीहरु नेपाल सरकारलाई प्रदान गरेको थियो । सामग्रीहरुमा कम्बल, पाल तथा सफा पिउने पानी र खाने कुराहरु रहेका छन् ।
चेतनाथ आचार्य
सि.आर.आई.
काठमाडौँ
|
