चीनको स्वायत्त प्रदेश तिब्बतको ल्हासाबाट सिगाच्छे हुँदै काठमाडौँसम्म रेलवेसेवा जोड्न चीन सकारात्मक रहेको कुरा प्रधानमन्त्री गिरिजाप्रसाद कोइरालाका परराष्ट सल्लाहकार डा. सुरेश चालिसेले पत्रकारहरुलाई बताउनुभएको छ।

      चिनियाँ जनराजनीतिक परामर्शदातृ सम्मेलनको राष्ट्रिय कमिटिका उपाध्यक्ष वा चुङ युले प्रधानमन्त्री गिरिजाप्रसाद कोइरालासँग भेट गरेपछि सो सम्भावना रहेको डा. चालिसेले बताउनुभएको हो । प्रधानमन्त्री गिरिजाप्रसाद कोइरालाले उपाध्यक्ष चुङ युलाई ल्हासाबाट काठमाडौँसम्म रेलमार्ग जोड्नका लागि अनुरोध गर्नुभएपछि उपाध्यक्ष चुङ युले यस बारेमा सकारात्मक जवाफ दिनुभएको सल्लाहकार चालिसेले बताउनुभयो।

      दुई दिन अगाडि काठमाडौँमा भएको पत्रकार भेटघाटमा डा. चालिसेले प्रधानमन्त्री कोइरालालाई उद्धृत गर्दै चीन सरकारसँग पेट्रोेल आपूर्ति गर्न तथा नेपालको सीमासम्म रेलमार्ग बिस्तार गर्न अनुरोध गरिएको बताउँदै सो बारेमा चीन सरकार सकारात्मक भएको बताउनुभयो

      चीनको तिब्बतको ल्हासा विश्वकै सबैभन्दा उच्च भागमा रेलवे सेवा भएको ठाउँ हो । डेढ वर्ष अगाडि छिन्हाइबाट चीनको तिब्बतमा रेलवे सेवा विस्तार भएको हो । चीन सरकारले आगामी वर्ष ल्हासाबाट सिगाच्छेसम्म रेलवेसेवा विस्तार गर्दैछ । सिगाच्छे नेपाल र चीनको सीमा तातोपानी खासाबाट नजिकै पर्ने हुनाले पहिलो चरणमा खासासम्म रेलवे सेवा विस्तार गर्ने र पछिल्लो चरणमा काठमाडौँ जोड्न सकिने कुरा डा. चालिसेले बताउनुभयो। पत्रकारहरुले सोधेको प्रश्नको जवाफ दिँदै प्रधानमन्त्रीका सल्लाहकार डा. चालिसेले नेपाल र चीनबीचमा रेलवे सेवा जोड्न सकियो भने नेपाली जीवन पद्धत्तिमा आमुल परिवर्तन हुने बताउनुभयो।

      भविष्यमा रेलवे सेवा जोड्‍न सकियो भने सस्तो मूल्यमा चिनियाँ सामान नेपाल भित्रिने, पर्यटन व्यवसायले प्रत्यक्ष लाभ लिने तथा पेट्रोलको आपूर्तिले नेपाली जीवन सरल हुनेछ। त्यति मात्र नभएर दुई देशबीचको मैत्री र सद्‍भावमा थप निकटता पनि आउने छ।

      चेतनाथ आचार्य

      सि.आर.आई.

      काठमाडौँ