दिगो विकास र राजनीतिक स्थायीत्वका लागि चीनको तिब्बत नेपालका लागि राम्रो उदाहरण रहेको संस्कृति, पर्यटन तथा नागरिक उड्डयन मन्त्री पृथ्वी सुब्बा गुरुङ्गले बताउनुभएको छ । आज काठमाडौँको राष्ट्रि सभागृहमा रुङ्गचङ्ग तिब्बत शीर्षकको फोटो प्रदर्शनीको उद्घाटन गर्दै मन्त्री गुरुङ्गले सो कुरा व्यक्त गर्नुभएको हो । संस्कृति पर्यटन तथा नागरिक उड्डयन मन्त्री गुरुङ्गले सांस्कृतिक आदानप्रदान तथा प्रदर्शनीले जनस्तरमा सम्बन्ध मजबुत हुँदै जाने बताउनुभयो । सन् 1961 पछि तिब्बतले विकासमा संसारलाई आश्चर्य पार्ने गरी फड्को मारेको उल्लेख गर्दै मन्त्री गुरुङ्गले भन्नुभयो नेपालमा पनि राजनीतिक स्थायीत्व र दिगो विकास हुने हो भने तिब्बतमा जस्तै प्रगति संभव छ।

      नेपालका लागि चिनियाँ राजदूत च सियाङ्गलिनले हजारौँ वर्षको इतिहास र संस्कृति बोकेको तिब्बत विश्वको छानो मानिएकोमा चिनियाँलाई गर्व लागेको बताउनुभयो । राजदूत सियाङ्गलिनले चीनले नेपाललाई असल र नजिकको छिमेकी राष्ट भएको हुनाले सधैँ महत्व दिएको पनि बताउनुभयो । नेपाल र चीनको तिब्बतबीचमा बस सेवा पुन सञ्चालन हुन लागेको, हवाइ सेवामा विस्तार भइरहेको तथा रसुवा स्याप्रुवेसी सडकको आगामी वर्षमा निर्माण कार्य सम्पन्न हुने पनि चिनियाँ राजदूत सियाङ्गलिनले व्यक्त गर्नभयो ।

      चिनियाँ तिब्बतशास्त्र अनुसन्धान केन्द्रका उप महानिर्देशक तेन्जि ग्याम्पोले रुङ्गचङ्ग तिब्बत फोटो प्रदर्शनीले आजको तिब्बतको यथार्थता प्रस्तुत गर्ने विश्वास व्यक्त गर्नुभयो । उहाँले तिब्बतको उज्यालो भविष्य त्यहाँको विकास र प्रगतिले देखाएको व्यक्त गर्दै तिब्बती परम्परा र संस्कृतिलाई फोटोमा कलात्मक तरिकाले समेटिएकोमा हेरेर अनुवभ गर्न अनुरोध गर्नुभयो।

      पर्सि शनिबारसम्म सञ्चालन हुने रुङ्गचङ्ग तिब्बत फोटो प्रदर्शनीमा दुई सयवटा तस्बिरहरु राखिएका छन् । नेपाल भ्रमणमा रहेको चिनियाँ प्रतिनिधिमण्डलले आजै त्रिभुवन विश्वविद्यालय कीर्तिपुरमा एक अन्तक्रिया कार्यक्रममा भाग लिएको छ। चिनियाँ प्रतिनिधिमण्डलले त्रिभुवन विश्वविद्यालयलाई दुईवटा कम्पयुटर उपहारस्वरुप प्रदान गरेको छ।

      चेतनाथ आचार्य

      सि.आर.आई.

      काठमाडौँ