 नेपाल र चीनका परराष्ट मन्त्रीहरुको बैठकमा भाग लिनका लागि चीनका सहायक परराष्ट्रमन्त्री ही याकेइले नेपालको भ्रमण गर्नेहुनुभएको हो । चिनियाँ सहायक परराष्ट मन्त्री याकेइले आगामी मार्च 2 तारिखदेखि 4 तारिखसम्म नेपालको भ्रमण गर्नुहुनेछ ।
परराष्ट्रमन्त्रालयका चिनियाँ डेक्सका लोकबहादुर क्षेत्रीले सि.आर.आई.लाई बताउनुभए अनुसार आगामी मार्च ३ तारिखमा नेपाल र चीनका परराष्ट्रमन्त्रालयको संयन्त्रको सातौँ बैठक परराष्ट मन्त्रालयमा बस्ने भएको छ । यस बैठकले दुई देशबीचको सम्बन्धमा विविध पक्षमाथि छलफल गर्नेछ ।
नेपाल र चीनबीचको सीमाका बारेमा, दुईपक्षीय सहयोगको विस्तारका बारेमा तथा दुवै देशबीचको आर्थिक तथा व्यापारिक सम्बन्धका बारेमा पनि बैठकमा छलफल हुनेछ । चीनले नेपालको विकासमा गर्दै आएको सहयोग तथा नेपाल र चीनबीचको सम्बन्धमा अझै न्यानोपन थपिएको अवस्थामा चिनियाँ सहायक परराष्ट्रमन्त्रीको नेपाल भ्रमणले महत्व बोकेको कुरा परराष्ट मन्त्रालयले बताएको छ ।
चिनियाँ सहायक परराष्ट मन्त्रीले नेतृत्व गर्नुहुने प्रतिनिधिमण्डलको स्वागतार्थ चीन अध्ययन केन्द्रले पनि एक कार्यक्रमको आयोजना गर्न लागेको छ ।
चीनमा आयोजना हुँदै गरेको 29 औँ ओलम्पिक खेलकूदको व्यापक प्रचारप्रसारसँगै चिनियाँ गतिविधि तीब्र रुपमा नेपालमा बढिरहेको छ । आसन्न संविधानसभाको निर्वाचनका लागि पनि चीनले नेपाललाई ठूलो सहयोग उपलब्ध गराएको छ ।
चेतनाथ आचार्य
सि.आर.आई.
काठमाडौँ
|
