नेपालको भूमिबाट चीनबिरोधी गतिबिधि भएकोमा चिन्ता प्रकट गर्दै चिनियाँ दूताबासका काउन्सिलर सि हुईले परराष्ट्र मन्त्री सहाना प्रधानसँग भेट गर्नुभएको छ। चिनियाँ दूताबासका काउन्सिलर हुईले गत बुधबार परराष्ट्र मन्त्री प्रधानलाई परराष्ट्र मन्त्रालय शितल निवासमा भेट गर्नुभएको हो।
परराष्ट्र मन्त्रालयको चिनियाँ डेक्सका शाखा अधिकृत लोकबहादर श्रेत्रीले सि.आर.आई.लाई बताउनु भए अनुसार काउन्सिलर र मन्त्रीबीचमा सौहार्दपूर्ण वातावरणमा कुराकानी भयो। चिनियाँ दूताबासका काउन्सिलर हुई केही दिनदेखि काठमाडौँमा चीन बिरोधी गतिविधि भएकोमा चिन्ता प्रकट गर्दै नेपाल सरकारसमक्ष स्पष्ट धारणा माग गर्नुभएको शाखा अधिकृत क्षेत्रीले सि.आर.आई.लाई बताउनुभयो। काठमाडौँमा बसोबास गरी विभिन्न व्यवसाय गरिरहेका चिनियाँ नागरिकको जिउधनको सुरक्षाका लागि पनि काउन्सिलरले परराष्ट्र मन्त्रीसँग चिन्ता प्रकट गर्नुभएको थियो।
परराष्ट्र मन्त्री प्रधानले काउन्सिलर हुईलाई नेपाल सरकार सदैव एक चीनको नीतिलाई स्वीकार गर्ने तथा नेपालको भूमि चीन बिरोधी गतिविधिमा प्रयोग गर्न नदिने नीतिमा अडिग रहेको बताउनुभएको थियो। नेपालमा हाल सात राजनीतिक पार्टीको संयुक्त सरकार भएको र परराष्ट्र मन्त्रालय नेकपा एमालेको भागमा परेको प्रस उल्लेख गर्दै नेकपा एमालले नेपालको भूमिबाट चीन बिरोधी गतिविधि भएकोमा भत्सर्ना गर्दै वक्तव्य आइसकेको पनि परराष्ट्र मन्त्री प्रधानले बताउनुभयो।
नेपाल र चीन सधैँ असल छिमेकी मित्रराष्ट भएको तथा पारस्पारिक सहयोग महत्वपूर्ण रहँदै आएको उल्लेख गर्दै दुई देशको सम्बन्धमा आँच आउने गतिविधिलाई सरकारले कडाइका साथ नियन्त्रण गर्ने विश्वास पनि परराष्ट्र मन्त्री प्रधानले चिनियाँ दूताबासका काउन्सिलरलाई दिनुभएको कुरा शाखा अधिकृत क्षेत्रीले बताउनुभयो।
चेतनाथ आचार्य
सि.आर.आई.
काठमाडौँ
|