नेपाल र चीनबीचमा सडक सम्पर्क बिकास गर्ने उद्देश्यले निर्माणाधीन रहेको रसुवा स्याप्रुबेसी सडक सन् 2010 भित्र सम्पन्न हुने भएको छ। भौतिक योजना तथा निर्माण मन्त्रालयले सि.आर.आई.लाई बताए अनुसार अहिले सडकको निर्माण कार्य तीब्र रुपमा भइरहेको छ।

           दुईवर्ष अगाडि निर्माण सुरु भएको रसुवा स्याप्रुबेसी सडक चिनियाँ सहयोगको परियोजना हो। एक अर्ब नेपाली रुपैयाँभन्दा बढी लागतको यो परियोजना सम्पन्न भएपछि खासा तातोपानी बाहेक चीनसँग अर्को व्यापारिक नाकाको प्रादुभाव हुनेछ।

           मन्त्रालयले बताए अनुसार यस परियोजनामा सम्पूर्ण प्रविधि र प्राविधिकहरु चिनियाँ नै लगाइएको छ। राजधानीबाट छोटो दुरीमा चीनको स्वायत्त प्रदेश तिब्बत जोड्ने यो सडकले नेपाल र चीनबीचको व्यापारिक सम्बन्धमा समेत अहं भूमिका निर्माण गर्नेछ। सडकले काठमाडौँ बाहेक नुवाकोट र रसुवा जिल्लालाई समेट्नेछ।

           यसैगरी चिनियाँ सरकारले तातोपानी खासा नाकाबाट माथिल्लो खासा बजारसम्मको कालोपत्रे सडकको मर्मत कार्य गरिरहेको छ। नेपाल हिमालय सिमापार वाणिज्य संघका अध्यक्ष दुर्गाबहादुर श्रेष्ठले सि.आर.आई.लाई बताउनु भए अनुसार अब केही दिनमा सम्पन्न हुने उक्त खण्डको सडक मर्मतले नेपाल र चीनबीचको व्यापारमा थप मदत पुराउने छ। तातोपानी खासा नाकादेखि माथिल्लो खासा बजारसम्मको सडक खण्ड साँगुरो तथा पुरानो पिच उप्किएकाले छोटो दुरीमा पनि सवारी आवतजावत गर्न लामो समय लाग्ने गरेको थियो।

चेतनाथ आचार्य

सि.आर.आई.

काठमाडौँ