तीन वर्ष अगाडिदेखि काठमाडौँका विभिन्न विद्यालय, विश्वविद्यालय तथा शैक्षिक संस्थामा चिनियाँ स्वयंसेविकाहरुद्बारा चिनियाँ भाषा प्रशिक्षण सुरु गरिएको हो। चिनियाँ दूताबास अन्तर्गत संस्कृति विभागको संयोजनमा प्रत्येक वर्ष चिनियाँ शिक्षक तथा शिक्षिकालाई स्वयंसेवकका रुपमा भाषा प्रशिक्षणमा खटाउने गरिएको छ।

          यो वर्ष पनि नेपालीहरुलाई चिनियाँ भाषा प्रशिक्षणका लागि 26 जना चिनियाँ स्वयंसेवकहरु काठमाडौँमा भरखरै आएका छन्। यसभन्दा अगाडि 19 जना मात्र चिनियाँ शिक्षकशिक्षिकाहरु आउने गरेका थिए। चिनियाँ भाषा सिक्ने विद्यार्थीको संख्या बढ्‍दै गएको तथा चिनियाँ शिक्षक माग गर्ने विद्यालयको संख्या पनि बढिरहेकाले स्वयंसेवको संख्या बढाउनु परेको दूताबासको संस्कृति विभागका तृतीय सचिव फानले सि.आर.आई.लाई बताउनुभयो।

          काठमाडौँ विश्वविद्यालयमा कन्फ्युसियस इन्स्टिच्युट नै स्थापन गरी चिनियाँ भाषा प्रशिक्षण गर्ने काम गत वर्षदेखि सुरु भएको छ। त्रिभुवन विश्वविद्यालयका विश्वभाषा क्याम्पसले लामो सयम अगाडि देखि नै चिनियाँ भाषा प्रशिक्षण गर्दै आएको छ। अहिले आएर निजी विद्यालय तथा विभिन्न इन्स्टिच्युटहरुले चिनियाँ भाषा प्रशिक्षण सुरु गरेका छन्।

          डिल्लीबजारका रहेको युनिभर्सल ल्याङ्‍ग्वेज एण्ड कम्प्युटर इन्स्टिच्युटमा गतवर्षदेखि नै चिनियाँ भाषाको गुणस्तर मापन परीक्षा प्रणाली अन्तर्गत एच.एस.के. पनि स्थापना भइसकेको छ। चीनसँगको अत्यन्त राम्रो सम्बन्ध तथा फैलदो व्यापारिक सम्बन्धका कारण नेपालीहरुमा चिनियाँ भाषा सिक्ने लगाव बढेको हो।

          नेपालीहरुमा पलाएको चिनिया भाषाको मोहसँगसँगै चिनियाँ संस्कृतिको पनि प्रभाव पर्न थालेको छ। धेरै नेपालीले चिनियाँ पोशाक, चलचित्र तथा कलालाई मन पराउने गर्दछन्।

चेतनाथ आचार्य

सि.आर.आई.

काठमाडौँ