|
 आगामी जुलाईको मध्यसम्ममा सम्पन्न गर्ने लक्ष्य राखेको काठमाडौँ तातोपानी अप्टिकल फाइबर परियोजनामा तार ओछ्याउने काम सुरु भएको छ। काठमाडौँको सुन्धारादेखि चीनको सीमा खासाको तातोपानीसम्मको दुरी एक सय पन्ध्र किलोमिटर रहेको छ। यो दुरीमा चिनियाँ सहयोगमा अप्टिकल फाइबर ओछ्याउने परियोजनाका लागि गत वर्ष दुई देशबीच हस्ताक्षर भएको हो।
अहिलेसम्म सो दुरीमध्ये 75 किलोमिटरसम्म नाली खनेर सकिएको नेपाल टेलिकम काठमाडौँ तातोपानी अप्टिकल फाइबर परियोजनाका प्रमुख मधुसुदन कर्माचार्यले सि.आर.आई.लाई बताउनुभयो। खनिएको 75 किलोमिटरमध्ये हालसम्म 62 किलोमिटरमा ड्रङ्ग लाइन हालिएको र अब तार ओछ्याउने कार्य थालिएको परियोजना प्रमुख कर्माचार्यले बताउनुभयो। तार ओछ्याउने काम अत्यन्त तीब्र गतिमा भएको र दस दिनमा 60 किलोमिटरसम्म तार ओछ्याउन सकिने कुरा उहाँले बताउनुभयो।
काठमाडौँदेखि तातोपानीसम्म अप्टिकल फाइबर ओछ्याउने परियोजनामा 44 जना चिनियाँ तथा 16 जना नेपाल टेलिकमका प्राविधिकहरु कार्यरत छन्। यसका अतिरित्त दैनिक ज्यालामा काम गर्ने कर्मचारीको संख्या सरदर दुई सय जति रहेको कर्माचार्यले बताउनुभयो।
परियोजनाले काठमाडौँदेखि तातोपानीसम्ममा 16 वटा टेलिकमका स्टेसनमध्ये 7 ठाउँमा घर पनि बनाएको छ। घर बनाइएका स्थानमा तातोपानी, बारुबीसे, लामोसाँघु, बलेफी, दोलालघाट, लामीडाँडा र तीनपिप्ले रहेका छन्। यसका अतिरित्त धुलिखेल, बनेपा, साँगा, नलिनचोक, भक्तपुर, गठ्ठाघर, कोटेश्वर, ववरमहल र सुन्धारामा अप्टिकल फाइबरका स्टेसनहरु रहने छन्।
अप्टिकल फाइबर ओछ्याइसकेपछि नेपाल र चीनबीचको दूरसञ्चारको गुणस्तरमा ठूलो परिवर्तन आउने छ। यसका साथै काठमाडौँदेखि बीरगंजसम्म अप्टिकल फाइबर ओछ्याइसकेपछि चीन र भारतबीच हुने टेलिफोन सम्पर्कमा पनि नेपालले निश्चित शुल्क पाएर फाइदा लिन सक्नेछ।
चेतनाथ आचार्य
सि.आर.आई.
काठमाडौँ
|
