स छुआनको वन छुआन जिल्लामा आएको 7.8 रेक्टर स्केलको भूइँचालोबाट आज बेलुकी छ बजेसम्म स छुआन, कान सु, छुंग छिंग र युन नान आदि ठाउँका जम्मा एक सय सातजनाको मृत्यु हुनुका साथै चौंतीसजना घाइते भएका छन। यसबाट हुनगएको जन-धनको क्षतिको विवरण संकलन गरिंदै छ।

         भूकम्प भएपछि चीनका राष्ट्राध्यक्ष हु चिन थाउले तत्कालै महत्वपूर्ण निर्देशन दिंदै सकेसम्म छिटो घाइते भएका मानिसहरुको उपचारको व्यवस्था गर्न र प्रकोपग्रस्त क्षेत्रका मानिसहरुको जीउ-ज्यानको आवश्यक सुरक्षाको प्रवन्ध मिलाउन सम्बन्धित निकायसँग आग्रह गर्नुभएको छ। चीनका प्रधानमन्त्री वन च्या पाउले आज स छुआनको भूकम्पग्रस्त क्षेत्र जाने विशेष विमानमा बोल्दै विभिन्न तहका सरकारी विभागले जनताको जीउ-धनको सुरक्षालाई उद्धार कार्यको पहिलो स्थानमा राख्नुपर्ने कुरामा जोड दिनुभएको छ।

          चिनियाँ सेना मातहत जरुरत कार्यको सामनासम्बन्धी कार्यालयका अधिकारीले जानकारी दिएअनुसार, भूकम्प गएपछि चिनियाँ जन-मुक्ति सेनाको चीफ अफ जनरल स्टाफको मुख्यालयको जरुरी अवस्थाका सामनासम्बन्धी पूर्व योजना छिटै संचालन गरिएको छ। छंग तु सैनिक विभागले प्रकोपको अवस्थाबारे जानकारी लिन भूकम्प केन्द्रमा कार्यकर्ता पठाउनुका साथै प्रकोपको अवस्थाबारे थाहा पाउन हेलिकोप्टर उडान पनि शुरु गराएको छ।

            यसका अतिरिक्त, चीनको भूकम्प विभागले पहिलो स्तरको पूर्व योजना संचालन गर्दै प्रकोपग्रस्त क्षेत्रमा कार्य टोली पनि पठाएको छ । प्रकोपको सामनासम्बन्धी राष्ट्रिय समिति र जन-मामिलासम्बन्धी मन्त्रालयले प्रकोप उद्धार कार्य-टोली गठन गरेर प्रकोपग्रस्त क्षेत्रमा पठाएका छन। चीनको रेडक्रस सोसाइटीले प्राकृतिक प्रकोपबाट उद्धार गर्ने र सहायता दिनेसम्बन्धी पहिलो स्तरको पूर्व योजना संचालन गर्दै आठ लाख युआन बराबरका सामानहरु प्रकोप ग्रस्त क्षेत्रमा पठाउँदैछन।